შარლ მიშელის შეთანხმების განხორციელების მიზნით სამუშაო ჯგუფი შეიქმნა, რომელსაც ვიოლა ფონ კრამონი უხელმძღვანელებს. ინფორმაციას საქართველოს პირველი არხი ავრცელებს.
როგორც ვიოლა ფონ კრამონი საქართველოს პირველ არხთან ექსკლუზიურ ინტერვიუში აცხადებს, იგი ევროპარლამენტის ინიციატივით ჩაუდგება სათავეში სამუშაო ჯგუფს, რომელიც ქართველ დეპუტატებთან ერთად შარლ მიშელის შუამავლობით მიღებულ შეთანხმებაში გაწერილი მიზნების მისაღწევად იმუშავებს.
ვიოლა ფონ კრამონის თქმით, "ჟან მონეს დიალოგის" სახელით ცნობილი მოლაპარალებების დაწყება ივნისში იგეგმება.
"ჟან მონეს დიალოგი" ევროპარლამენტის მიერ მშვიდობისა და დემოკრატიისათვის შემუშავებული ინსტრუმენტია, რომელიც საპარლამენტო მედიაციასა და დიალოგს აერთიანებს.
აღნიშნული ფორმატი ითვალისწინებს პოლიტიკური ლიდერების დიალოგს, რათა მათ კონსენსუსს მიაღწიონ ეროვნული პოლიტიკისთვის მნიშვნელოვან საკითხებზე.
