2 ივნისს, საქართველოში ამერიკის შეერთებული შტატების სენატორების დელეგაციას ელოდებიან, რომლის შემადგენლობაშიც სენატორები ჯინ შაჰინი და რობერტ პორტმანი არიან.
საქართველოში აშშ-ის საელჩოს ცნობით, ვიზიტის მიზანია "საქართველოსთვის ორმხრივი გზავნილის გადაცემა, რომ შეერთებული შტატები მხარს უჭერს ქართველ ხალხს ქვეყანაში დემოკრატიის განმტკიცებაში".
როგორც აშშ-ის ელჩმა საქართველოში კელი დეგნანმა განაცხადა, სენატორები შეხვედრებს გამართავენ როგორც მთავრობის წარმომადგენლებთან, ასევე ოპოზიციისა და სამოქალაქო საზოგადოების ლიდერებთან.
საქართველოს საგარეო საქმეთა მინისტრის დავით ზალკალიანის განცხადებით, სენატორების ვიზიტი იმის გამოხატულებაა, თუ რაოდენ დიდ მნიშვნელობას ანიჭებს ამერიკის შეერთებული შტატების როგორც აღმასრულებელი, ისე საკანონმდებლო შტო საქართველოსთან სტრატეგიული პარტნიორობის განვითარებას.
"სენატორი შაჰინი და პორტმანი ასევე არიან ჩემპიონები საქართველოს მხარდაჭერაში ჩვენი ევროპული და ევროატლანტიკური ინტეგრაციის მხარდაჭერაში, ამერიკის შეერთებულ შტატებთან სტრატეგიული პარტნიორობის გაღრმავების კუთხით. ძალიან დროული ვიზიტია. ძალიან მნიშვნელოვანი ვიზიტი იქნება რომელიც თავის ასახვას ჰპოვებს უკვე შემდგომ ნაბიჯებში ამერიკის შეერთებული შტატების მხრიდან", - განაცხადა ზალკალიანმა.
სენატორები თბილისში კიევიდან ჩამოვლენ და საქართველოში 4 ივნისამდე დარჩებიან.
ფოტო: Reuters
