პირველ რიგში, უნდა აღინიშნოს, რომ ეს გადაწყვეტილება მათი მარცხის საბოლოო გაფორმებაა, ასე ეხმიანება პარტია ქართული ოცნების თავმჯდომარე ერთიანი ნაციონალური მოძრაობის გადაწყვეტილებას პარლამენტში შესვლასთან დაკავშირებით. ირაკლი კობახიძის განცხადებით, გუშინ „ნაციონალურმა მოძრაობამ“ მიიღო გადაწყვეტილება, შარლ მიშელის დოკუმენტის ხელმოწერის გარეშე პარლამენტში შემოსვლის შესახებ.
"პირველ რიგში, უნდა აღინიშნოს, რომ ეს გადაწყვეტილება მათი მარცხის საბოლოო გაფორმებაა. 6 თვის განმავლობაში ისინი ახორციელებდნენ საბოტაჟს ლეგიტიმურად არჩეული პარლამენტის წინააღმდეგ. ისინი იმუქრებოდნენ პარლამენტში არშესვლით, თუმცა საბოლოდ მოუწიათ უკან დახევა და პოლიტიკური კაპიტულაციის გამოცხადება.
„ვერ დამიჭერთ, არ გამოვალ, ვერ შევალ - დასრულდა დაჭერით, გამოსვლით და შესვლით. ამას მარტივი მიზეზი აქვს: საქართველოს ჰყავს ხელისუფლება, რომლის მხარეს არის სიმართლე და ძალა, რომელიცფართო საზოგადოებრივ მხარდაჭერას ეფუძნება. შესაბამისად, რადიკალური ოპოზიციის ნებისმიერი მცხდელობა - დაუპირისპირდეს დემოკრატიულ სისტემას, მომავალშიც ასეთივე წარუმატებლობისთვის არის განწირული“, - განაცხადა ირაკლი კობახიძემ.
მისივე თქმით, ნათელია, რომ „ნაცმოძრაობის“ პარლამენტში შესვლას პარლამენტის ფუნქციონირებისათვის არავითარი ღირებულება არა აქვს.
„ამ პოლიტიკურ ძალას არა აქვს არავითარი რესურსი დემოკრატიული სისტემის ფუნციონირებაში რაიმე დადებითი წვლილი შეიტანოს. იმ პირობებში კი, რომ ისინი პარლამენტში შარლ მიშელის დოკუმენტის ხელმოწერის გარეშე შემოდიან, პარლამენტში მათ ყოფნას არავითარი ფორმალური ფასიც კი არა აქვს. მიშელის დოკუმენტის ხელმოწერაზე უარი ნიშნავს, რომ ეს პარტია კვლავაც არ აღიარებს და პატივს არ სცემს სახელმწიფო ინსტიტუტებსა და საერთაშორისო პარტნიორებს. შესაბამისად, მათ ამ გადაწყვეტილებას უსათუოდ ლოგიკური შედეგები ექნება. უპირველეს ყოვლისა, თუ „ნაციონალური მოძრაობა“ გონივრულ ვადაში არ მოაწერს ხელს დოკუმენტს, ისინი მონაწილეობას ვერ მიიღებენ ვერც ერთი სამუშაო ჯგუფის მუშაობაში, რომელიც მიშელის დოკუმენტით გათვალისწინებული გადაწყვეტილებების მოსამზადებლად არის შექმნილი ან მომავალში შეიქმნება. გარდა ამისა, თუ მიშელის დოკუმენტს გონივრულ ვადაში ხელი არ მოეწერება, ისინი ვერ ისარგებლებენ ვერ ერთი პრივილეგიით, რომელსაც ეს დოკუმენტი ოპოზიციური პარტიებისთვის ითვალისწინებს. დარწმუნებული ვართ, საბოლოოდ ამ შემთხვევაშიც „ნაციონალურ მოძრაობას“ უკან დახევა და დოკუმენტზე ხელის მოწერა მოუწევს “, - განაცხადა ირაკლი კობახიძემ.
