ეს პოლიტიკური პარტია, რომელიც ახლა უნდა შეიქმნას არანაირად არ გახლავთ „ქართული ოცნების“ მოკავშირე, ასე გამოეხმაურა ვიცე-სპიკერი არჩილ თალაკვაძე გიორგი გახარიას პარტიის "საქართველოსთვის", რომლის პრეზენტაციაც ხვალაა ჩანიშნული.
„ჩვენ ამ არჩევნებში გავიმარჯვებთ დამაჯერებლად. დარწმუნებული ვარ, რომ ჩვენი საზოგადოება სწორად შეაფასებს რა მიღწევები და რა ცვლილებებია, ასევე გამოწვევებზე რა პასუხები აქვს „ქართულ ოცნებას“ დღეს. გარწმუნებთ, რომ ეს არჩევნებიც იქნება კონკურენტული არჩევნები. ჩვენ ამისთვის დემოკრატიული რეფორმები ჩავატარეთ.
რაც შეეხება გიორგი გახარიას, თუ რა პერსპექტივა აქვს მის პარტიას, რომელიც ჯერ არ არის შექმნილი და ექნება პრეზენტაცია, ამაზე თავად უნდა ისაუბროს, წინასწარ მის პერსპექტივებზე რაიმე შეფასებები გავაკეთოთ, მგონი არ იქნება სწორი. ჩვენ ჩვენს მხარდამჭერებს ვუთხარით მკაფიოდ, რომ „ქართული ოცნება“ არის კონსოლიდირებული გუნდი. რა თქმა უნდა, ეს პოლიტიკური პარტია, რომელიც ახლა უნდა შეიქმნას არანაირად არ გახლავთ „ქართული ოცნების“ მოკავშირე, მონათესავე ან რაიმე პროექტის ნაწილი როგორც ამაზე ჩვენი ოპონენტები და ოპონენტების მართული ტელევიზიები ინსინუაციების შექმნას ცდილობენ. მგონია, ამ ქვეყანაში ოპოზიციური პარტიის დეფიციტს არ განვიცდით. მთავარი ინტერესი დღეს ის კი არ უნდა იყოს, კიდევ რამდენი ოპოზიციური პარტია იქნება შექმნილი, უნდა იყოს მიმართული იქითკენ, რაც ხალხს ყველაზე მეტად აწუხებს“, - განაცხადა თალაკვაძემ.
