პოლიტიკური ნიშნით შევიწროვება ხდება, სამწუხაროა, რომ "ქართული ოცნება" უფრო მეტად ემსგავსება მის წინამორბედს - აცხადებს პარლამენტის დამოუკიდებელი დეპუტატი, ე.წ. გახარიას გუნდის წევრი ბექა ლილუაშვილი.
მისი შეფასებით, ადგილი აქვს პოლიტიკური ნიშნით ფართომასშტაბიანი შევიწროების პროცესს.
"ბოლო ორი დღის განმავლობაში საზოგადოებამ ნათლად დაინახა, რომ შევიწროების კონკრეტული ფაქტები რამდენიმე რეგიონში ერთდროულად ხდება; იხილა, როგორ ხდება პოლიტიკური ნიშნით, ღიად, საჯაროდ და შეიძლება ითქვას, სამაგალითოდ კეთილსინდისიერი საჯარო მოხელეების პოლიტიკური ნიშნით შევიწროება და მათი სამსახურიდან გათავისუფლება. მოსახლეობამ იხილა, როგორ ხდება პოლიტიკური ნიშნით შევიწროება წინა ხელისუფლებისთვის დამახასიათებელი მეთოდებით. უბრალოდ, ძალიან სამწუხაროა და ჩვენი მოქალაქეებისთვის უკიდურესად იმედგაცრუებაა, რომ მსგავსი მეთოდების გამოყენებით ხელისუფლება უფრო მეტად ემსგავსება მის წინამორბედს", - თქვა ლილუაშვილმა.
