ბოდბელი ეპისკოპოსი იაკობი ივერი მელაშვილსა და მთავარი არხის გადამღებ ჯგუფზე თავდასხმას ეხმიანება და ვარაუდობს, რომ ეს მელაშვილის მხრიდან შეგნებული პროვოკაცია იყო.
"რა ვიცით რომ ეს ივერის მხრიდან შეგნებული პროვოკაცია არ იყო. არ ვიტყვი ისეთ რამეს, რაზეც პასუხისმგებელი ღმერთთანაც არ ვიქნები. ივერის რომ დაინახავ შევადარებდი კორიდას, ხართან რომ გადიან. ივერი არის მატადორი. ჟურნალისტები გამოდიხართ უბრალოდ, რა რომ ესვრიან ხოლმე, ლაფარს რომ არჭობენ, კლავთ ხარს, ხო? ის ხარი გირქენს მერე, წაგაქცევს. მერე მიაქვთ და აჭმევენ ადამიანებს. როცა მიდიხარ, პირნათელი ხომ უნდა იყო?"- ამბობს ეპისკოპოსი.
როგორც მეუფე აღნიშნავს, ივერი მელაშვილი სხვა დროს რომ დაეკავებინათ, არავის გაახსენდებოდა.
"ცუდი რა არის იცით, ისეთ პერიოდში დაიჭირეს, სალაპარაკო გაუხდა ხალხს თორემ, მოეკიდათ მანამდე, ვის გაახსენდებოდა? უვარგისი ადამიანია და არ უნდა ჩადიოდეს, დაეტიოს. მაგას შეუძლია ოპოზიციურ პარტიებში იაროს, ტაშს ვინც უკრავდა. ქართველ ერთან გამოსასვლელი ცხვირ-პირი მაგას არ აქვს. ახლა როგორც გინდათ ისე შეაფასეთ და ვისაც უნდა ისე შეაფასოს. ჩემი ერის მტრებს ჩვენ სხვანაირად ვეპყრობით"- ამბობს მეუფე იაკობი.
შეგახსენებთ, შინაგან საქმეთა სამინისტრომ ივერი მელაშვილსა და "მთავარი არხის" ჟურნალისტებზე თავდასხმის ფაქტზე გამოძიება ძალადობის მუხლით დაიწყო.
"მთავარი არხის" მიერ გავრცელებული ინფორმაციით, დავით გარეჯის მიმდებარედ ივერი მელაშვილსა და გადამღებ ჯგუფს სასულიერო პირები თავს დაესხნენ.
ტელეკომპანიის ინფორმაციით, სასულიერო პირების გაღიზიანება დავით გარეჯში ივერი მელაშვილის მისვლამ გამოიწვია. მათ დააზიანეს "მთავარი არხის" კამერა, ფიზიკურად გაუსწორდნენ გადამღებ ჯგუფს.