საქართველოს ეკონომიკისა და მდგრადი განვითარების სამინისტროს შპს „მთის კურორტების განვითარების კომპანიასა“ და  USAID-ის ეკონომიკური უსაფრთხოების პროგრამს შორის ურთიერთთანამშრომლობის მემორანდუმის ფარგლებში, ხორციელდება შპს „მთის კურორტების განვითარების კომპანიის“ მხარდაჭერა ახალი ტურისტული პროდუქტების შექმნის, საერთაშორისო სპორტული ღონისძიებების ორგანიზების, კურორტებზე უსაფრთხოების ზომების გაუმჯობესების, მთის კურორტების პერსონალის კვალიფიკაციის ამაღლებისა და სხვა მიმართულებით.  

მემორანდუმის ფარგლებში, USAID-ის ეკონომიკური უსაფრთხოების პროგრამის მხარდაჭერით და დაფინანსებით განხორციელდა პროექტი „ფრირაიდის ტრენინგი, ღონისძიებების მართვა და უსაფრთხოების ტრენინგ კურსი“ (Free Ride Training, Event Management and Safety Training Course), რაც მოიცავს საქართველოს სამთო-სათხილამურო კურორტებზე გუდაურსა და თეთნულდზე ფრირაიდის მსოფლიო ტურის და საკვალიფიკაციო ეტაპების ჩატარებისთვის საერთაშორისო ექსპერტების მიერ მთის კურორტებზე ადგილის შესწავლასა და სამაშველო გუნდის გადამზადებას. პროექტის განხორციელების შედეგად საქართველოში დაიგეგმება და ჩატარდება ფრირაიდის მსოფლიო ტური და საკვალიფიკაციო ეტაპები, რაც სამომავლოდ მნიშვნელოვნად შეუწყობს ხელს საქართველოს ცნობადობის გაზრდას  და სამთო კურორტების პოზიციონირებას ფრირაიდის ღონისძიებების ახალ ლოკაციებად.

პროექტის პარტნიორები არიან მსოფლიოში წამყვანი ფრანგული კომპანიები Compagnie Des Alpes და Evolution2. აღნიშნული პროექტის განხორციელების მიზნით, საერთაშორისო ექსპერტებმა განახორციელეს კურორტ თეთნულდსა და გუდაურში ფრირაიდის მსოფლიო ტურის და საკვალიფიკაციო ეტაპების ჩასატარებლად ადგილის შესწავლა და სამაშველო გუნდის გადამზადება საზვავე უსაფრთოების, რისკის მართვისა და პირველადი სამედიცინო დახმარების სფეროში.