რობერ სტურუასთან დაკავშირებით პირდაპირ გეტყვით, როგორც კულტურის მინისტრი, მისი გათავისუფლება არ იგეგმება, – აცხადებს კულტურის მინისტრი თეა წულუკიანი.
მინისტრის თქმით, ასევე გაცხადდა, რომ ის წასვლას არ აპირებს. "ეს არის ის ადამიანი, რომელიც დამეთანხმებით, მხოლოდ ერთი ბადალი თუ ჰყავს, ჩვენ მას ყველამ უნდა მივცეთ შესაბამისი საშუალება, რომ იმუშაოს და იმოღვაწეოს. ეს არის მისი საქმე. კარგი იქნება, თუ შევწყვეტთ მასზე თავდასხმას“, – განაცხადა წულუკიანმა.
კულტურის მინისტრი მსახიობ ნინუცა მაყაშვილის განცხადებასაც გამოეხმაურა, რომელმაც ასევე მსახიობი ბესო ზანგური ძალადობაში დაადანაშაულა. მისი თქმით, ძალადობაზე საუბარი არასდროს არაა გვიან.
"გასაგებია, რომ 11 წლის წინ ქალები და არამცთუ 11 წლის წინ, რამდენიმე წლის წინაც ვერ საუბრობდნენ ღიად. სწორედ ამიტომ, „ქართული ოცნების“ ხელისუფლების ინიციატივითა და გადაწყვეტილებით, მე წილად მხვდა ყველაზე ის პატივი, რაც გულისხმობდა ევროპაში ქალზე ძალადობის წინააღმდეგ ინსტრუმენტის ხელმოწერა, ეს გახლავთ სტამბოლის კონვენცია, რომელსაც ხელი მოვაწერე 2014 წელს ყველას, ქართველი გოგონებისა და ქალების სახელით. ჩვენ მსხვერპლს ვერასდროს ვუსაყვედურებთ, რატომ არ ილაპარაკე დროზეო.
ნინუცა მაყაშვილი, მიუხედავად იმისა, რომ მიწვეული იყო საგამოძიებო ორგანოში, ის ჯერ არ მისულა. იმედია უარს არ აცხადებს, თუნდაც ფიქრობდეს, რომ 11 წლის შემდეგ გვიანია საგამოძიებო ორგანოში სიარულიო, მინდა ვუთხრა, რომ ითანამშრომლოს საგამოძიებო ორგანოებთან, ვინაიდან ეს სხვა ქალების უფლებების დაცვისთვის არის უკიდურესად მნიშვნელოვანი“, – განაცხადა წულუკიანმა.