ცოტა ხნის წინ, იმერეთის სამხარეო ადმინისტრაციაში დასრულდა მთავრობის წარმომადგენლებსა და რიონის ხეობის მცველების შეხვედრა.
შეხვედრის დასრულების შემდეგ, მედიასთან პირველი კომენტარი "ნამახვანჰესის" მშენებლობის მოწინააღმდეგე აქციის ერთ-ერთმა ორგანიზატორმა, ვარლამ გოლეთიანმა გააკეთა.
გოლეთიანის განცხადებით, შეხვედრა მშვიდ და კონსტრუქციულ რეჟიმში წარიმართა, რამაც გააჩინა შემდგომი დიალოგის პერსპექტივა.
როგორც ვარლამ გოლეთიანმა განაცხადა, მოლაპარაკებების გასაგრძელებლად აუცილებელია სამი პირობის შესრულება.
"უნდა ალაგდეს ბარიკადები, სამუშაო პროცესები ხეობაში უნდა შეწყდეს და გავაგრძელოთ კარვებით პროტესტი. ამის შემდეგ დავიწყებთ კონსტრუქციულ დიალოგს მიწასთან, ხელშეკრულებასთან და სხვადასხვა საკითხებზე. ვისაუბრებთ პირობებზე, რომელსაც დავაყენებთ. კომპეტენციის ნაწილში მათ არ ეხებათ, არ შეუძლიათ პასუხების გაცემა გარემოსდაცვითი და სხვადასხვა საკითხებზე, როდესაც გადავალთ კონსტრუქციული დიალოგის ნაწილში მერე ვნახოთ. ვადას რაც შეეხება, კონკრეტულ დღეებზეა საუბარი, მაგრამ დამოკიდებული არიან პრემიერის ჯანმრთელობაზე, სახელდება კოვიდის ფაქტორი. როგორც კი სამუშაო რეჟიმს დაუბრუნდება პრემიერი, მიიღებენ გადაწყვეტილებას ამ პირობებზე, რომელიც ჩვენ დავაყენეთ. თუ დაკმაყოფილდება სამივე პირობა, შემდეგ შევძლებთ ვიმსჯელოთ სხვა საკითხებზე", - განაცხადა გოლეთიანმა.
იმერეთის სამხარეო ადმინისტრაციაში დღეს მთავრობის ადმინისტრაციის რეგიონებთან ურთიერთობის დეპარტამენტის უფროსისა და გუბერნატორების, ასევე დეპუტატებისა და „ნამახვანჰესის“ საწინააღმდეგო აქციის მონაწილეების შეხვედრა გაიმართა.
დიალოგში ხელისუფლების მხრიდან მონაწილეობდნენ მთავრობის ადმინისტრაციის რეგიონებთან ურთიერთობის დეპარტამენტის ხელმძღვანელი ლერი მეძმარიაშვილი, პარლამენტის რეგიონული პოლიტიკისა და თვითმმართველობის კომიტეტის თავმჯდომარე სოზარ სუბარი, სამტრედიის, წყალტუბოს, ხონის და ვანის მაჟორიტარი დეპუტატი გივი ჭიჭინაძე, ქუთაისის მაჟორიტარი დეპუტატი ზაზა ლომინაძე, ზესტაფონის, ბაღდათის, თერჯოლისა და ტყიბულის მაჟორიტარი დეპუტატი ბეჟან წაქაძე, ამბროლაურის, ონის, ცაგერის, ლენტეხისა და მესტიის მაჟორიტარი დეპუტატი გოჩა ენუქიძე, უმრავლესობის წევრები დიმიტრი სამხარაძე და გოდერძი ჩანქსელიანი.