12 აპრილიდან საქართველოს მოქალაქეების ისრაელში ლეგალურ დასაქმებაზე რეგისტრაცია დაიწყო.
საქართველოს მოქალაქეები ისრაელის სახელმწიფოში ხანგრძლივი მოვლის დაწესებულებებში დამხმარე მუშაკის პოზიციაზე დასაქმებას შეძლებენ.მათ ევალებათ ხანდაზმულების/შეზღუდული შესაძლებლობის მქონე პაციენტების მოვლა.
დამხმარე მუშაკის ფუნქცია-მოვალეობები
პაციენტის მოვლა და გადაადგილებაში დახმარება;
პაციენტის ჰიგიენაზე ზრუნვა (მათ შორის, დაბანა, მოწესრიგება, თეთრეულის გამოცვლა);
პაციენტის კვება/კვებაში დახმარება;
პაციენტთან კომუნიკაცია;
პალატის სისუფთავის დაცვა;
ექთნის ზედამხედველობისა და მითითებების შესაბამისად პაციენტებისათვის საჭირო სხვა დახმარების გაწევა.
შრომის ანაზღაურება
კვირაში 42-საათიანი სამუშაო გრაფიკით მუშაობის შემთხვევაში თვეში დარიცხული ხელფასი შეადგენს სულ მცირე 5300 შეკელს (2021 წლის 11 აპრილის კურსის შესაბამისად, 1610 აშშ დოლარის ექვივალენტი);
კვირაში 58-საათიანი სამუშაო გრაფიკით მუშაობის შემთხვევაში - 8023 შეკელი (დაახ. 2440 აშშ დოლარი თვეში).
რა ხარჯების დაფარვა მოუწევს შერჩეულ კანდიდატს აქ და ისრაელში
საქართველოს მოქალაქის პასპორტის აღების ღირებულება (მოქმედი ბიომეტრიული პასპორტის არ ქონის შემთხვევაში);
ისრაელში გამგზავრების ბილეთის საფასური;
სამედიცინო გამოკვლევის საფასური;
COVID-19-ზე PCR ტესტის საფასური.
სამედიცინო დაზღვევა: 125 შეკელი
საცხოვრებლის ხარჯი: 264-დან 485 შეკელამდე
კომუნალური გადასახადი: დაახლოებით 93 შეკელი.
ხელფასის დაბეგვრა
საშემოსავლო გადასახადი: დარიცხული ხელფასი 6330 შეკელამდე - იბეგრება 10%-ით, ხოლო 6631-დან 9080-მდე - 14%-ით;
სოციალური დაზღვევის გადასახადი: ხელფასის 0.04%, თუ დარიცხული ხელფასის ოდენობა არ აღემატება 6330 შეკელს, ხოლო თუ დარიცხული თვიური ხელფასი 6330 შეკელზე მეტია, გადასახადის განაკვეთია 0.87 % ყოველ დამატებითი შეკელზე.
დასაქმების ხელშეწყობის სახელმწიფო სააგენტოს ინფორმაციით, აღნიშნული გადასახადებისა და გადასახდელების გადახდის შემდეგ ე.წ. "ხელზე ასაღები" ხელფასი თვეში იქნება სულ ცოტა 1100 აშშ დოლარი (კვირაში 42 საათის მუშაობის შემთხვევაში), ან 1800 აშშ დოლარი (კვირაში 58 საათის მუშაობის შემთხვევაში).
დასაქმების ხანგრძლივობა 1 წელია (ისრაელში ჩასული დასაქმებული მიიღებს ერთწლიან ვიზას, რომლის მოქმედების ვადის გაგრძელება შესაძლებელია ყოველწლიურად, მაქსიმუმ 5 წლის განმავლობაში).
2021 წლის განმავლობაში, დაგეგმილია 1000 საქართველოს მოქალაქის დასაქმება ისრაელში.
