ამერიკის საელჩო გმობს ტელეკომპანია ფორმულას თანამშრომლებზე განხორციელებულ თავდასხმას. ამის შესახებ საელჩოს მიერ გავრცელებულ განცხადებაშია ნათქვამია.
საელჩოს მოუწოდებს ხელისუფლებას, ჩაატაროს ამ შემთხვევების სწრაფი, სრულყოფილი და მიუკერძოებელი გამოძიება.
"ამერიკის შეერთებული შტატების საელჩო გმობს ტელეკომპანია ფორმულას თანამშრომლებზე გუშინ განხორციელებულ თავდასხმისა და ვანდალიზმის ფაქტს. ამას წინ უსწრებდა, თებერვალში, ფორმულას ჟურნალისტის ვახო სანაიას ცემის ინციდენტი. მოვუწოდებთ ხელისუფლებას, ჩაატაროს ამ შემთხვევების სწრაფი, სრულყოფილი და მიუკერძოებელი გამოძიება. თავდასხმა ჟურნალისტებზე მიუღებელია.
დემოკრატიულ სახელმწიფოებში ჟურნალისტებს უნდა ჰქონდეთ თავისუფლება და შეეძლოთ საქმიანობის უსაფრთხოდ განხორციელება. სასიცოცხლოდ მნიშვნელოვანია, რომ მათ შესძლონ სამსახურებრივი მოვალეობების შესრულება საზოგადოების ინფორმირების, სახელმწიფო ინსტიტუციებისა და მთავრობის ანგარიშვალდებულების უზრუნველსაყოფად", - ვკითხულობთ განცხადებაში.
ტელეკომპანია "ფორმულას" ინფორმაციით, მის თანამშრომლებს თავს დაესხნენ და ფიზიკურად იძალადეს. "ფორმულა" აცხადებს, რომ ერთ-ერთ მათგანს ფიზიკურად გაუსწორდნენ, მეორეს კი მანქანა დაუმტვრიეს.
შინაგან საქმეთა სამინისტროს ინფორმაციით, "ფორმულას"ჟურნალისტის ავტომობილის დაზიანების ფაქტზე დაწყებულია გამოძიება, ხოლო "ცემის ფაქტზე საგამოძიებო უწყებისთვის არავის მიუმართავს".
