ახალციხის "იმედის" კლინიკის ექიმი ვიოლეტა ინასარიძე, რომელიც აცხადებდა რომ მეგი ბაქრაძეს, რაც ვაქცინაციის შემდეგ შეუძლოდ გახდა, მაშინვე გაუკეთა ადრენალინი, საერთოდ არ იმყოფებოდა დაყოვნების ოთახში. ამის შესახებ ნათქვამია პროკურატურის მიერ გავრცელებულ განცხადებაში,
პროკურატურამ ექიმ ვიოლეტა ინასარიძეს, კიდევ ერთ ექიმსა და ექთანს ბრალი ცრუ ჩვენებისთვის წარუდგინა.
"სისხლის სამართლის საქმეზე მოწმის სახით გამოიკითხნენ ბ.ლ., ვ.ი. და თ.გ, რომლებიც გამოკითხვის დაწყებამდე გამომძიებლის მიერ გაფრთხილებულ იქნენ საქართველოს სისხლის სამართლის კოდექსის 370-ე მუხლით გათვალისწინებული სისხლისსამართლებრივი პასუხისმგებლობის შესახებ. მიუხედავად ამისა, მათ ხელი შეუშალეს მართლმსაჯულებას და პირადი მოტივით, რათა არ გამჟღავნებულიყო, რომ ვ.ი. არ იმყოფებოდა პირველადი სამედიცინო დახმარების გაწევის დროს პაციენტთან, გამოძიებას ცრუ ინფორმაცია მიაწოდეს. კერძოდ, ვ.ი.-ს ჩვენების მიხედვით, 18 მარტს, ახალციხის კლინიკაში, იმუნიზაციის შემდგომი დაყოვნების ოთახში მყოფი მ.ბ.-ს ჯანმრთელობის მდგომარეობის გაუარესების შემდეგ, გართულების დაწყებისთანავე, თითქოს მის მიერ და ასევე მისი ხელმძღვანელობით, პაციენტს ჩაუტარდა შესაბამისი სამედიცინო პროცედურები. აღნიშნული ფაქტი ჩვენებებით დაადასტურეს ასევე ბ.ლ-მ და თ.გ-მ. თუმცა გამოძიებით დადგინდა, რომ იმუნიზაციის შემდეგ ვ.ი-ს მ.ბ-ს მიმართ რაიმე მედიკამენტი არ გამოუყენებია და იმ დროს, როცა მ.ბ-ს გაუწიეს გართულების შემდგომი გადაუდებელი სამედიცინო დახმარება, ვ.ი. დაყოვნების ოთახში საერთოდ არ იმყოფებოდა", - ნათქვამია პროკურატურის განცხადებაში.
უწყების ინფორმაციით, ბრალდებულები წაყენებულ ბრალს აღიარებენ.
შეგახსენებთ, ვიოლეტა ინასარიძე მედიასთან საუბრისას აცხადებდა, რომ ერთ-ერთი პირველი იყო, რომელმაც 27 წლის მედდას პირველადი დახმარება აღმოუჩინა. მისი თქმით, მეგი ბაქრაძეს ადრენალინი მაშინვე გაუკეთა და პარალელურად რეანიმატოლოგი გამოიძახა.
"მშვენივრად იყო, ინტერვიუც ჩაიწერა, 25 წუთში შეუძლოდ გახდა, ზოგადი სისუტე და რაღაც ქავილი, თითქოს მექავებაო. მაშინვე, ამას ვადასტურებ, გამზადებული შპრიცი, ბარძაყზე გაკეთდა, მაშინვე, ადრენალინი, 0,5 გრამი. გავუკეთეთ კათეტერიზაცია და ჩატარდა დესენსიბილაციის პრეპარატები, დიმედროლი, სუპრასტინი", - ამბობდა ვიოლეტა ინასარიძე.
შეგახსენებთ, რომ 27 წლის მედდა ახალციხის კლინიკა "იმედში" 18 მარტს აცრეს, ის რამდენიმე წუთში კომაში ჩავარდა. პაციენტი 19 მარტს თბილისში, პირველ საუნივერსიტეტო კლინიკაში გარდაიცვალა. გარდაცვალების საქმესთან დაკავშირებით გამოძიება შინაგან საქმეთა სამინისტრომ დაიწყო.