Facebook-მა "ქართულ მარშთან" დაკავშირებული 24 გვერდი, 12 ჯგუფი და 34 ანგარიში წაშალა. ამის შესახებ ნათქვამია სოციალური ქსელის მიერ გამოქვეყნებულ ანგარიშში.
Facebook-ის ინფორმაციით, გასულ თვეში 11 სხვადასხვა ქვეყნის 14 ქსელი აღმოაჩინეს და წაშალეს. 11 ქვეყანას შორის საქართველოც მოხვდა.
როგორც სოციალური ქსელის ანგარიშში ვკითხულობთ, "ქართულ მარშსა" და მის ახალგაზრდულ ფრთასთან დაკავშირებული ქსელი ატლანტიკური საბჭოს ციფრული გამოძიების კვლევის ლაბორატორიის ანგარიშის შემდეგ აღმოაჩინეს.
"ამ ქსელში ჩართული ადამიანები იყენებდნენ ყალბ ანგარიშებს, რათა სოციალურ ქსელში პოსტების გამოქვეყნებასთან ერთად, ემართათ გვერდები და ჯგუფები. მათი არაერთი გაფრთხილება ჰქონდათ მიღებული სიძულვილის ენის გამოყენებისა და სოციალური ქსელის საკომუნიკაციო სტანდარტის დარღვევის გამო", - ნათქვამია განცხადებაში.
საქართველოს გარდა, Facebook-მა ქსელები წაშალა ირანში, ალბანეთში, ესპანეთში, არგენტინაში, ეგვიპტეში, ისრაელში, ბენინსა და მექსიკაში.