მიხეილ სააკაშვილ უნდა მიეცეს საშუალება, ჩაერთოს ქვეყანაში ზოგადად პოლიტიკურ პროცესში, ასევე ყველა იმ პროცესში, რომელიც ქვეყანაში მიმდინარეობს - ასე გამოეხმაურა "ნაციონალური მოძრაობის" წევრი აკაკი მინაშვილი ევროპარლამენტარ კუბილიუსის განცხადებას, რომ მოლაპარაკებებში მონაწილეობა უნდა მიიღონ არა ფორმალურმა, არამედ რეალურმა ლიდერებმა - მიხეილ სააკაშვილმა და ბიძინა ივანიშვილმა.
აკაკი მინაშვილის თქმით, მიხეილ სააკაშვილის მიმართ მიმდინარეობს პოლიტიკური დევნა.
"მიხეილ სააკაშვილის მიმართ არის პოლიტიკური დევნა. უკვე ცხრა წელია ეს პოლიტიკური დევნა მიმდინარეობს ყოველგვარი საფუძვლის გარეშე და პოლიტიკურად მართული სასამართლოს მიერ. ბუნებრივია, მას უნდა მიეცეს საშუალება, ჩაერთოს ქვეყანაში ზოგადად პოლიტიკურ პროცესში, ასევე ყველა იმ პროცესში, რომელიც ქვეყანაში მიმდინარეობს. კიდევ ერთხელ ვიმეორებ და ეს თვითონ მიხეილ სააკაშვილმაც თქვა, მთავარი მომლაპარაკებელი ამ მაგიდაზე უნდა იყოს ნიკა მელია და ის უნდა იყოს გათავისუფლებული. ზოგადად, პოლიტიკური დევნა ამ ქვეყანაში უნდა დასრულდეს. ეს არის აუცილებელი. მიხეილ სააკაშვილის დევნა უნდა დასრულდეს. მესმის, მათ ეშინიათ მიხეილ სააკაშვილის. მათ ეშინიათ „ნაციონალური მოძრაობის“ და ოპოზიციური პარტიების. ამიტომ, ახლა ყველა მათი ნაბიჯი მოტივირებულია იმით, რომ ძალაუფლება შეინარჩუნონ", - განაცხადა მინაშვილმა.
