სააკაშვილისა და ივანიშვილის ერთ ტონალობაში ხსენება შეურაცხყოფაა - ასე გამოეხმაურა "ქართული ოცნების" თავმჯდომარე ირაკლი კობახიძე ევროპარლამენტარ კუბილიუსის განცხადებას, რომ მოლაპარაკებებში მონაწილეობა უნდა მიიღონ არა ფორმალურმა, არამედ რეალურმა ლიდერებმა - მიხეილ სააკაშვილმა და ბიძინა ივანიშვილმა.
ირაკლი კობახიძის განცხადებით, სააკაშვილმა საქართველოში დანაშაულებრივი სისტემა შექმნა, ივანიშვილმა კი, ეს ქმედებები აღკვეთა.
"ერთ მხარეს არის მიხეილ სააკაშვილი, რომელმაც შექმნა კრიმინალური სისტემა, იმსხვერპლა უამრავი ადამიანის სიცოცხლე, ჯანმრთელობა, ბიზნესი, დაგვაკარგვინა ტერიტორიების 20% - მეორე მხარესაა ადამიანი, რომელმაც აღკვეთა ეს დანაშაულებრივი სისტემა, როდესაც ერთ ტონალობაში ახსენებ ამ ორ ადამიანს ეს არის შეურაცხყოფა" , - ამბობს კობახიძე.
შეგახსენებთ, ცოტა ხნის წინ დასრულდა, "ქართული ოცნების წარმომადგენლების შეხვედრა კრისტიან დანიელსონთან. ირაკლი კობახიძის განცხადებით, შეხვედრაზე განიხილეს სავარაუდო შეთანხმების რამდენიმე დეტალი. მისივე თქმით, კიდევ ერთი შეხვედრა დღეს 18:00 საათზე გაიმართება.
