საქართველოს ჯანდაცვის მინისტრის, ეკატერინე ტიკარაძის განცხადებით, ის მზად არის, რომ ასტრაზენეკას ვაქცინით აიცრას. ასე უპასუხა ტიკარაძემ "რუსთავი 2"-ის ეთერში ჟურნალისტის მიერ დასმულ შეკითხვას, აიცრებოდა თუ არა ასტრაზენეკას ვაქცინით.
ტიკარაძის თქმით, ვაქცინაციის შესახებ საინფორმაციო კამპანიის ფარგლებში, იგი ჩინური ვაქცინით აცრას გეგმავდა.
"დიახ, რა თქმა უნდა, ვაპირებ აცრის გაკეთებას. მნიშვნელოვანია, რომ ჩვენ ყველა საჯაროდ ავიცრათ სხვადასხვა ვაქცინით. ჩინური ვაქცინა, რომელზეც არაერთი მითია, გადაწყვეტილი იყო, რომ მე ამ ვაქცინით ავიცრებოდი.
დღეს მიმდინარეობს შეჯერების პროცესი, თუ რა სახეს მიიღებს ეს კამპანია, რადგან ის, რაც იყო დაგეგმილი, შესაძლოა, აღარ იყოს საკმარისი, რომ მოსახლეობა ჩვენ დავარწმუნოთ ვაქცინის სანდოობაში. ამ ყველაფერთან დაკავშირებით, ორშაბათს მოვახსენებთ საზოგადოებას თუ, რა კონკრეტულ გადაწყვეტილებას მივიღებთ.
მნიშვნელოვანია, საზოგადოებამ ეს ნახოს საჯაროდ, მათ შორის, როგორ ვიცრებით ასტრაზენეკას ვაქცინით," - აღნიშნა ტიკარაძემ.
