იტალია და კვიპროსი ხვალიდან განაახლებენ ასტრაზენეკას ვაქცინის გამოყენებას. ამის შესახებ ევროკავშირის წევრი ქვეყნების ჯანდაცვის ეროვნული მარეგულებლები იტყობინებიან.
იტალიისა და კვიპროსის ამ გადაწყვეტილებას წინ უსწრებდა ევროპის მედიკამენტების სააგენტოს განცხადება იმასთან დაკავშირებით, რომ ასტრაზენეკას ვაქცინა უსაფრთხო და ეფექტურია.
ორივე ქვეყანა ასტრაზენეკას პრეპარატით ვაქცინაციის პროგრამას 19 მარტიდან განაახლებს.
ცოტა ხნის წინ, ევროპის მედიკამენტების სააგენტომ განაცხადა, რომ იმუნიზაციის უსაფრთხოების კომიტეტის დასკვნით, ვაქცინა უსაფრთხო და ეფექტურია და მისი გამოყენება უნდა გაგრძელდეს.
"ექსპერტთა კომიტეტმა გამოიტანა მკაფიო სამეცნიერო დასკვნა: ეს არის უსაფრთხო და ეფექტური ვაქცინა... კომიტეტმა ასევე დაასკვნა, რომ ვაქცინა არ არის დაკავშირებული თრომბის და სისხლის შედედების პრობლემებთან", - თქვა ემერ კუკმა, ევროპის მედიკამენტების სააგენტოს დირექტორმა.
სააგენტოს მიერ გავრცელებული ინფორმაციით, მიუხედავად ამ დასკვნისა, ისინი კვლავ გააგრძელებენ დაკვირვებას თრომბის შემთხვევებსა და ვაქცინას შორის შესაძლო მიზეზ-შედეგობრივი კავშირის დასადგენად.
ვროკავშირის მარეგულირებელმა თრომბსა და ვაქცინას შორის შესაძლო კავშირის შესწავლა მას შემდეგ დაიწყო, რაც ევროპის 10-ზე მეტმა ქვეყანამ დროებით შეაჩერა ასტრაზეენკას პრეპარატით ვაქცინაციის პროცესი.
გუშინ, ჯანმრთელობის მსოფლიო ორგანიზაციამ განაცხადა, რომ AstraZeneca-ს ვაქცინის უპირატესობა მის რისკებს აღემატება და ქვეყნებს ვაქცინაციის გაგრძელებისკენ მოუწოდა.