რუსეთს შეერთებული შტატებისგან ბოდიშის მოხდა სურს, მას შემდეგ, რაც პრეზიდენტმა ბაიდენმა თქვა, რომ ის პუტინს მკვლელად მიიჩნევს, წინააღმდეგ შემთხვევაში მოსკოვი ვაშინგტონს სათანადოდ უპასუხებს. განაცხადა რუსეთის საკანონმდებლო ორგანოს ზედა პალატის, ფედერაციის საბჭოს სპიკერის მოადგილემ, კონსტანტინ კოსაჩოვმა.
კოსაჩოვის ამ განცხადებას წინ უსწრებდა აშშ-ის პრეზიდენტ ჯო ბაიდენის ინტერვიუ ტელეკომპანია ABC News-სთან, სადაც მან განაცხადა, რომ რუსეთს აშშ-ის საპრეზიდენტო არჩევნებში ჩარევის გამო საფასურის გადახდა მოუწევს.
ამავე ინტერვიუში, ჟურნალისტის მიერ დასმულ შეკითხვაზე, ფიქრობს თუ არა, რომ პუტინი მკვლელია, ბაიდენმა დადებითად უპასუხა.
ბაიდენის ინტერვიუს შემდეგ, მოსკოვმა თავისი ელჩი აშშ-ში კონსულტაციებისთვის გაიწვია.
კოსაჩოვის განცხადებით, ბაიდენის განცხადება მიუღებელია და ის კიდევ უფრო მეტად დააზარალებს ორ ქვეყანას შორის არსებულ ისედაც ცუდ ურთიერთობებს.
მისივე თქმით, მოსკოვში უკვე გადაეწურათ იმის იმედი, რომ აშშ-ის ახალი ადმინისტრაცია რუსეთთან მიმართებაში უწინდელ პოლიტიკას გადახედავდა.
კოსაჩოვის განცხადებით, რუსეთის ელჩის გამოწვევა ერთადერთი გონივრული ნაბიჯი იყო ამ ვითარებაში.
"მე ვფიქრობ, ეს უკანასკნელი ნაბიჯი არ იქნება, თუ ამერიკული მხარე ბოდიშს არ მოიხდის ან ახსნა განმარტებას არ გააკეთებს", - აცხადებს კოსაჩოვი.
"ამგვარი შეფასება დაუშვებელია ასეთი რანგის სახელმწიფო მოღვაწისაგან და ის არავითარ შემთხვევაში არ არის მისაღები", - დასძინა რუსმა დეპუტატმა.
კრემლს ჯერჯერობით ოფიციალური განცხადება არ გაუკეთებია პრეზიდენტ ბაიდენის კომენტართან დაკავშირებით, თუმცა სააგენტო Reuters-ის ცნობით, სავარაუდოდ, კრემლი დღეს გამოეხმაურება აშშ-ის პრეზიდენტს.