აფხაზეთისა და ცხინვალის რეგიონების ოკუპირებულ ტერიტორიებად აღიარება არის მთავარი წინაპირობა იმისა, რომ მოხდეს ამ რეგიონების დეოკუპაცია.
ამის შესახებ რეინტეგრაციის საკითხები სახელმწიფო მინისტრმა თემურ იაკობაშვილმა ტერიტორიული მთლიანობის აღდგენის საპარლამენტო კომისიის სხდომაზე განაცხადა.
მისი თქმით, აღნიშნული რეგიონები ოკუპირებულად აღიარა უკვე რამდენიმე ქვეყანამ, მათ შორის ამერიკის შეერთებულმა შტატებმა და მათი განცხადებები, როგორც წესი, ლირიკის დონეზე არ რჩება და კონკრეტულ იურიდიულ სახეს იღებს.
"ოკუპირებული ტერიტორიების არაღიარების პოლიტიკა წარმატებით ხორციელდება და ამ კუთხით ჩვენ აქტიურ მუშაობას ვაგრძელებთ, თუმცა ახლა უკვე ჩვენი მიზანია წარმატებულად განხორციელდეს აფხაზეთისა და ცხინვალის რეგიონების ოკუპირებულ ტერიტორიებად ცნობა, რადგან ეს მათი დეოკუპაციისთვის მნიშვნელოვანი შემადგენელი ნაწილია", - აღნიშნა იაკობაშვილმა.
სახელმწიფო მინისტრმა კომისიის წევრებს საქართველოს ოკუპირებულ ტერიტორიებზე არსებული ვითარებაც გააცნო და აღნიშნა, რომ რუსეთის ხელისუფლება კვლავ აქტიურად აგრძელებს გარკვეულ ქვეყნებზე ზეწოლა, რომ მოხდეს დე-ფაქტო ქვეყნების აღიარება.
