ხვალ საქართველოში ვაქცინაციის პროცესი იწყება. პირველი, ვინც კორონავირუსის ვაქცინას საჯაროდ გაიკეთებს დაავადებათა კონტროლის ცენტრის დირექტორის მოადგილე პაატა იმნაძე იქნება.
დილის 08:45 საათზე იმნაძის შემდეგ ინფექციურში აიცრებიან მარინა ეზუგბაია, მარინა ენდელაძე, დავით გადელია და პირველი რეგისტრირებული ექიმი თამარ გიორგაძე.
რესპუბლიკურ საავადმყოფოში 10:00 საათზე აიცრებიან ექიმები ზაზა კაციტაძე, ლევან ვაშაკიძე და ლევან გოფოძე. ასევე 10:00 საათზე იაშვილის სახელობის ბავშვთა ცენტრალურ საავადმყოფოში ვაქცინას გაიკეთებს ექიმი პედიატრი ივანე ჩხაიძე.
11:00 საათზე კავკასიის მედიცინის ცენტრში აიცრება ექიმი პედიატრი თემურ მიქელაძე, 12:30 საათზე ინფექციურში ექიმი გუგა ქაშიბაძე.
პირდაპირ ეთერში აიცრებიან დილის 10:00 საათზე ბათუმის რესპუბლიკურ საავადმყოფოში აჭარის ჯანდაცვის მინისტრი ნინო ნიჟარაძე, საზოგადოებრივი ჯანდაცვის ხელმძღვანელის მოადგილე ნონა ეფაძე, ბათუმის რესპუბლიკური საავადმყოფოს დირექტორი სოლომონ ფუტკარაძე და ექიმი ილია ნაკაშიძე. ექიმები საჯაროდ აიცრებიან ქუთაისსა და თელავში.
საქართველოში "ასტრაზენეკას" პირველი 43 200 დოზა 13 მარტს ჩამოვიდა. 15 მარტიდან ჯანდაცვის სფეროს მუშაკების აცრა დაიწყება.
