ქუთათელ-გაენათელი მიტროპოლიტი იოანე აცხადებს, რომ მისთვის "ასტრაზენეკას" ვაქცინა მიუღებელია. ამის შესახებ მიტროპოლიტმა რუსთავში ტაძრის კურთხევის შემდეგ, "ინფო-რუსთავის" მიერ დასმული შეკითხვის საპასუხოდ განაცხადა.
"გააჩნია, რომელ ვაქცინაზეა საუბარი. არის სხვადასხვა ვაქცინები, სხვადასხვა ბაზაზე შესრულებული. აღმოჩნდა, სამწუხაროდ, რომ ერთ-ერთი ვაქცინა არის აბორტის მსხვერპლისგან დამზადებული, უმანკო ჩანასახისგან აღებული ნაწილი შედის იქ. ეს ჩემთვის მიუღებელია, კანიბალიზმის დონემდე მიდის უდანაშაულოს, უმანკოს, ძალადობით მოკლულის მიერ ჯანმრთელობას მივხედოთ. ეს განხილული იყო წმინდა სინოდზეც. საუბარია ასტრაზენეკაზე და ჩემთვის მიუღებელია, თუნდაც მხოლოდ ამიტომ.
"მე ჩემი სიტყვა ვთქვი და მთავრობამ თავის სიტყვა თქვას. არის მეორეც, ფაიზერი, მაგრამ რომელს შემოიტანს მთავრობა, ეს მისი საქმეა, ჩვენ რელიგიური მოტივით შეგვიძლია ვთქვათ უარი. გვაქვს უფლება მოვითხოვოთ ის, რომელიც ჩვენთვის მისაღებია. ვთქვით უკვე, რა არის ამ ვაქცინის საფუძველი. მგონი ეს რომ ეცოდინებათ, არავინ არ მოინდომებს. რეკომენდაციას მრევლს მეტს აღარ მივცემთ, გამოვააშკარავეთ რა არის ჩადებული ამ ვაქცინაში და თვითონ ადამიანმა გადაწყვიტოს მისთვის მისაღებია თუ არა", - განაცხადა მიტროპოლიტმა.
"ასტრაზენეკას" ვაქცინა მსოფლიოს ყველაზე მკაცრმა და ავტორიტეტულმა მარეგულირებელმა ორგანოებმა დაამტკიცეს. ვაქცინა უსაფრთხო და ეფექტურია და ამ მტკიცებულების საწინააღმდეგო სანდო ინფორმაცია არ არსებობს. ასტრაზენეკას ვაქცინა უკვე დაამტკიცეს ჯანმრთელობის მსოფლიო ორგანიზაციამ, ბრიტანეთის მარეგულირებელმა და ევროპის მედიკამენტების სააგენტომ.
