15 მარტიდან თურქეთში მოგზაურობის წესები იცვლება.
თურქეთის რესპუბლიკის ჯანდაცვის სამინისტროს ინფორმაციით, ქვეყნის ტერიტორიაზე შესვლისთვის ელექტრონული ანკეტის შევსება სავალდებულო იქნება.
მოგზაურობის მსურველმა, ელექტრონულ ანკეტაში უნდა მიუთითოს შემდეგი სახის ინფორმაცია: სახელი, გვარი, ეროვნება, პასპორტისა და ტელეფონის ნომრები, ასევე ელექტრონული ფოსტის მისამართი.
ჯანდაცვის სამინისტროს განცხადებით, აღნიშნული ინფორმაცია საჭიროა იმისთვის, რომ თუ მოგზაურს ან მასთან კონტაქტში მყოფ პირს კორონავირუსი დაუდასტურდება, შესაბამის პირებთან დაკავშირება დაუყოვნებლივ მოხდეს.
უწყების ინფორმაციით, ამის გამო, მნიშვნელოვანია ანკეტაში შეტანილი ინფორმაციის სიზუსტე, ფორმის შევსება გამგზავრების მსურველებს მგზავრობამდე 72 საათით ადრე მოუწევთ. აღნიშნული არ ვრცელდება ტრანზიტულ მგზავრებზე.
გარდა ამისა, თურქეთში შესვლისთვის ბოლო 72 საათის განმავლობაში გაკეთებული PCR ტესტის უარყოფითი პასუხის დამადასტურებელი ცნობის წარდგენის ვალდებულება გაგრძელდება 2021 წლის 15 აპრილამდე.
