სამართალდამცავების მიერ დაკავებულ "ქართული პარტიის" ოფისის თანამშრომლებს იმედა სისაურისა და ვასილ ჯავახიშვილს ფიზიკური დაზიანებები აღენიშნებათ - ამის შესახებ სისაურისა და ჯავახიშვილის ადვოკატმა ირმა ჭკადუამ "ქართული პარტიის" ოფისში გამართულ ბრიფინგზე განაცხადა.
მისი თქმით, დაკავებულები სამართალდამცავებმა გორის წინასწარი დაკავების იზოლატორში გადაიყვანეს.
"მე შევხვდი ჯავახიშვილსა და სისაურს. ისინი გორის წინასწარი დაკავების იზოლატორში არიან. მათ ეტყობათ ფიზიკური დაზიანებების კვალი. სხვა საკითხება მათი ინტერესებიდან გამომდინარე არ ვახმაურებთ", - განმარტავს ჭკადუა.
შეგახსენებთ, რომ "ქართული პარტიის" თანამშრომლები იმედა სისაური და ვასილ ჯავახიშვილი აფეთქების დაგეგმვის გამო, თბილისში დააკავეს.
შსს-ის ცნობით, ეჭვმიტანილები ხელყუმბარებით შეიარაღებულები მიემართებოდნენ არგოს ქუჩა #18-ში, სადაც მორიგი დანაშაულის ჩადენას გეგმავდნენ.
მანამდე, 13 აგვისტოს და 14 სექტემბერს არგოს ქუჩა 18-ში მდებარე გურამ ჟორჟოლიანის საცხოვრებელი სახლის ეზოში აფეთქება მოხდა.
გამოძიების შედეგად, თბილისის გლდანი-ნაძალადევის რაიონის პოლიციის სამმართველოს თანამშრომლებმა დააკავეს 1969 წელს დაბადებული ვასილ ჯავახიშვილი და მისი თანამზრახველი, წარსულში ძარცვისთვის ნასამართლევი 1979 წელს დაბადებული იმედა სისაური, რომელთაც "ერგედე-5" და " ეფ-1" ტიპის ხელყუმბარები აღმოაჩნდათ. იმედა სისაურის ბინის ჩხრეკისას ამოღებულია ავტომატის და პისტოლეტის მჭიდები და სამბრძოლო მასალა.
