სომხეთის პრემიერ-მინისტრმა, ნიკოლ ფაშინიანმა ქვეყნის პრეზიდენტ არმენ სარქისიანს გენშტაბის უფროსის, ონიკ გასპარიანის გათავისუფლების მოთხოვნით კვლავ მიმართა. ამის შესახებ ფაშინიანმა სოციალურ ქსელში დაწერა.
ნიკოლ ფაშინიანის პირველი მოთხოვნა ონიკ გასპარიანის გადაყენების შესახებ სომხეთის პრეზიდენტმა არ დააკმაყოფილა. პრეზიდენტის ადმინისტრაციამ ეს გადაწყვეტილება იმით განმარტა, რომ გენერალური შტაბის გადაყენების განკარგულების პროექტი კონსტიტუციასთან წინააღმდეგობაში მოდიოდა.
სომხეთის კანონმდებლობით, პრემიერ-მინისტრი უფლებამოსილია კიდევ ერთხელ მიმართოს პრეზიდენტს გენერალური შტაბის უფროსის გადაყენების მოთხოვნით. მეორედ მიმართვის შემთხვევაში, პრეზიდენტმა ხელი უნდა მოაწეროს განკარგულებას ან საკონსტიტუციო სასამართლოს მიმართოს. კონსტიტუციით დადგენილი ამ პროცედურების არშესრულების შემთხვევაში, განკარგულების აქტი პრეზიდენტის ხელმოწერის გარეშე შევა ძალაში.
როგორც ცნობილია, 25 თებერვალს სომხეთის შეიარაღებულმა ძალებმა მოითხოვეს პრემიერ-მინისტრისა და რესპუბლიკის მთავრობის გადადგომა. ფაშინიანმა ეს მოწოდება შეაფასა, როგორც სამხედრო გადატრიალების მცდელობა და პრეზიდენტს გასპარიანის გადაყენების შუამდგომლობით მიმართა.
