თბილისის მერიის მულტიფუნქციური ბიბლიოთეკების გაერთიანების ფილიალები, სრული დატვირთვით იხსნება. 1 მარტიდან ბიბლიოთეკები, ხოლო 2 მარტიდან, ნაძალადევისა და ვარკეთილის მედიათეკები განაახლებენ მუშაობას.
ქვეყანაში არსებული გარკვეული შეზღუდვების გათვალისწინებით, ფილიალებისთვის შემუშავებულია ახალი განრიგი: ბიბლიოთეკები იმუშავებს ორშაბათიდან პარასკევის ჩათვლით, 10-დან 18 საათამდე, ხოლო ვარკეთილისა და ნაძალადევის მედიათეკები იმუშავებს ყოველდღე, ორშაბათის გარდა, 11-დან 19 საათამდე.
„რამდენიმე თვიანი პაუზის შემდეგ, ჩვენი ფილიალები კვლავ ელიან მკითხველს, სტუდენტებს, და მათ, ვინც ჩვენს მყუდრო სივრცეებს სამუშაოდ სტუმრობს. მათთვის და ყველა თანამშრომლისთვის, გათვალისწინებულია ჯანდაცვის სამინისტროს მიერ გაცემული ყველა რეკომენდაცია და უზრუნველყოფილია უსაფრთხო გარემო. ყველას ვთხოვ, დაიცვან კარგად ცნობილი წესები, რათა შეუფერხებლად შევძლოთ ფუნქციონირება", - ამბობს თბილისის მერიის მულტიფუნქციური ბიბლიოთეკების გაერთიანების დირექტორი, ნინია მაჭარაშვილი.
1 და 2 მარტს არ გაიხსნება მხოლოდ ვაკის მედიათეკა, ასევე მე-9 (ჭავჭავაძის 24) და 25-ე (ლილოს დასახლება) ბიბლიოთეკები, სადაც სარემონტო-სარეაბილიტაციო სამუშაოები მიმდინარეობს. აღნიშნულ ფილიალებში განახლდება ინფრასტრუქტურა, ტექნიკა, ჩატარდება შენობის აღდგენითი სამუშაოები და სხვა.
