ვიდრე ოპოზიცია დაქსაქსული იქნება, მისი ყოველი ნაბიჯი სააკაშვილის რეჟიმს ხელისუფლებაში ყოფნის დროს გაუხანგრძლივებს. ამის შესახებ კონსერვატორების ერთ-ერთმა ლიდერმა კახა კუკავამ ჭადრაკის სასახლეში გამართულ შეხვედრაზე განაცხადა, სადაც საზოგადოებრივი მოძრაობების საინიციატივო ჯგუფი, პოლიტიკურ პარტიებს, არასამთავრობო ორგანიზაციებს და საზოგადოების წარმომადგენლებს ქვეყნის საქართველოს პოლიტიკური კრიზისიდან გამოყვანის გზებზე ესაუბრებოდნენ.
კუკავას განცხადებით, ჭადრაკის სასახლეში ოპოზიციური ერთიანობის იდეის ჩამოყალიბებისთვის ბევრი შეხვედრა გამართულა და მათი უმრავლესობა შედეგის გარეშე დასრულებულა.
კუკავამ იმედი გამოთქვა, რომ დღევანდელი შეხვედრა და დარბაზში არსებული ემოცია მხოლოდ ერთი დღით არ შემოიფარგლება და ყოველივე ეს სტრუქტურულ ბრძოლაში გადაიზრდება.
"იმედი მაქვს, ეს ყველაფერი არ დარჩება მხოლოდ ერთი დღის ემოციად და თანმიმდევრულ სტრუქტურულ ბრძოლაში გადაიზრდება", - განაცხადა კუკავამ.
დღევანდელ შეხვედრას ესწრებოდნენ ეროვნული ფორუმის ლიდერები - კახა შარტავა, ირაკლი მელაშვილი, გუბაზ სანიკიძე, კონსერვატორები - კახა კუკავა, ლაშა ჩხარტიშვილი, ზვიად ძიძიგური, "ჩვენი საქართველო - თავისუფალი დემოკრატების" ერთ-ერთი ლიდერი ზურაბ აბაშიძე.
