ხვალ, 21 თებერვალს საქართველოს პირველი კონსტიტუციის მიღებიდან 100 წლის თავზე, სამოქალაქო აქტივისტები გამართავენ აქციას სახელად "კარავი 1921".
აქციის ორგანიზატორები აცხადებენ, რომ დღეს, თითქოს, შეკრების უფლება ფუნდამენტური უფლებაა, ისევე როგორც 100 წლის წინ, მაგრამ "ჩვენ გვიწევს დავამტკიცოთ, რომ ნამდვილად ასეა"
"100 წლის მერეც არ არის დაცული 1921 წლის კონსტიტუციის 33-ე მუხლი: "საქართველოს რესპუბლიკის მოქალაქეთ უფლება აქვთ მთავრობის ნებადაურთველად შეიკრიბნენ საჯაროდ და უიარაღოდ, როგორც ჭერქვეშ, ისე გარეთ."
100 წლის მერეც, ჩვენს კონსტიტუციაში შეკრების თავისუფლება ადამიანის ფუნდამენტური უფლებაა: "ყველას აქვს წინასწარი ნებართვის გარეშე საჯაროდ და უიარაღოდ შეკრების უფლება."(მუხლი21)
100 წლის მერეც, ჩვენი კონსტიტუცია ეყრდნობა 1921 წლის კონსტიტუციის ისტორიულ-სამართლებრივ მემკვიდრეობას. ეს არის ჩვენი სამოქალაქო განაცხადი! თუმცა, ხელისუფლება ჯიუტად არღვევს მას.
დღეს, თითქოს, შეკრების თავისუფლება ფუნდამენტური უფლებაა, ისევე როგორც 100 წლის წინათ, მაგრამ ჩვენ გვიწევს დავამტკიცოთ, რომ ნამდვილად ასეა. ჩვენ ვიკრიბებით, იმისთვის რომ დავიცვათ ღირებულება, რომლისთვისაც იბრძოდნენ. ერთად ვიკითხოთ კონსტიტუცია ჯიუტად", - ვკითხულობთ აქციის ორგანიზატორების მიერ გავრცელებულ განცხადებაში.
ორგანიზატორები მოუწოდებენ მოქალაქეებს, პარლამენტთან შეიკრიბონ 13:00-ზე თუ:
- შენთვის სულ ერთი არ არის შენი და შენი შვილების უფლება;
- ღირებულია წინაპრების მონაპოვარის დაცვა;
- არსად წასვლას არ აპირებ. აქ დგახარ და სხვაგვარად არ ძალგიძს.
ამ სიმბოლური აქციით, ორგანიზატორები ეხმიანებიან პარლამენტის მიმდებარე ტერიტორიაზე გუშინდელ საპროტესტო აქციას, სადაც პოლიციამ მათ კარვების გაშლის უფლება არ მისცა. სამართალდამცველებსა და აქციის ორგანიზატორებს შორის შეხლაშემოხლის დროს, პოლიციამ 25 აქტივისტი დააკავა, რომელიც მოგვიანებით ხელწერილის საფუძველზე გაათავისუფლა.
