საქართველოს საგარეო საქმეთა სამინისტროში მალაიზიაში დაკავებულ საქართველოს მოქალაქეებთან დაკავშირებით განმარტებები გააკეთეს.
როგორც სს სამინისტროს საკონსულო დეპარტამენტის დირექტორმა გიორგი ტაბატაძემ ჟურნალისტებს განუცხადა, მალაიზიაში დაკავებული ორი პიროვნება ნამდვილად საქართველოს მოქალაქეა, თუმცა გამოძიების ინტერესებიდან გამომდინარე, მათი ვინაობა არ ხმაურდება.
"ჩვენი წარმომადგენელი მალაიზიაში უკვე გაეცნო საქართველოს მოქალაქეების დაკავებასთან დაკავშირებულ საკითხებს. გვაქვს ინფორმაცია, რომ ორივე დაკავებული საქართველოს მოქალაქეა და მათ ბარგში აღმოჩენილი სურათების ჩარჩოებში ნამდვილად იყო ნარკოტიკული ნივთიერება ჩადებული. დაკავებულები დანაშაულს არ აღიარებენ და აცხადებენ, რომ მათ ბარგი სხვამ გაატანა მალაიზიაში და ის მათ საკუთრებას არ წარმოადგენს. საქართველოს მოქალაქეების აყვანა მალაიზიის კუნძულ ბორნეუზე და პენანგზე მოხდა და სავარაუდო მარშუტი შედგებოდა სტამბული-მაროკო-კამერონი-მალაიზია," - განაცხადა ტაბატაძემ.
მისივე თქმით, იმ შემთხვევაში, თუ დაკავებულებს აღნიშნულ საქმესთან პირდაპირი კავშირი დაუდგინდა, მალაიზიის კანონმდებლობის მიხედვით, მათ სიკვდილით დასჯა ელოდებათ.
იმ შემეთხვევაში, თუ მათი ნარკოტიკების საქმესთან დაკავშირებით უშუალო ბრალეულობა გამორიცხა, საქართველოს მოქალაქეების მიმართ შემამსუბუქებელი გარემოება იმოქმედებს, რაც იმას ნიშნავს, რომ სიკვდილის დასჯა ასცდებათ.
ამასთან ტაბატაძის ინფორმაციით, 2 ან 3 ნოემბერს დაგეგმილია მალაიზიაში დაკავებული ქართველების სასამართლო პროცესის გამართვა, რის შემედეგაც უკვე ქართული მხარე მიიღებს გადაწყვეტილებას რა ფორმით ჩაერთოს პრობლემის მოგვარებაში.
"სასამართლოს შემდეგ როგორ მოხდება დაკავებულების დაცვა მივიღებთ გადაწყვეტილებას და თუ მალაიზიის კანონმდებლობა მოგვცემს საშუალებას რომ მათი საქართველოში ექსტრადაცია მოვითხოვოთ ამას აუცილებლად გავაკეთებთ, თუმცა სასამართლო პროცესამდე კონკრეტული ქმედებების დასახელება გვიჭირს რომელიც შეიძლება ჩვენი მხრიდან განხორციელდეს," - აღნიშნა ტაბატაძემ.
