დახურული სივრცის მსგავსად პირბადის ტარება ღია სივრცეებშიც სავალდებულო ხდება.
საკანონმდებლო ორგანომ მესამე მოსმენით მხარი დაუჭირა „ადმინისტრაციულ სამართალდარღვევათა კოდექსში“ შესატანი ცვლილებების პროექტს, რომლის თანახმად, პანდემიის ან/და ეპიდემიის დროს დახურულ და ღია საჯარო სივრცეში პირბადის ტარების წესის დარღვევა გამოიწვევს პირის დაჯარიმებას 20 ლარით. აღსანიშნავია, რომ კანონის ამ დრომდე მოქმედი რედაქცია პირბადის წესის დარღვევის გამო დაჯარიმებას მხოლოდ დახურულ სივრცეებში ითვალისწინებდა.
კანონპროექტის თანახმად, იმ შემთხვევაში, თუკი მოქალაქე დახურულ ან ღია საჯარო სივრცესა და ტრანსპორტში პირბადის წესის დარღვევისთვის განმეორებით დაჯარიმდება, სანქციის ოდენობა 40 ლარი იქნება.
მკაცრდება ასევე ჯარიმა იმ დაწესებულებებისთვისაც, სადაც პირბადის გარეშე მომხმარებლის დაშვება განმეორებით მოხდება. კერძოდ, აღნიშნული ქმედება გამოიწვევს საჯარო სივრცის მფლობელის დაჯარიმებას 1 000 ლარით.
