ცოტა არ იყოს გამიკვირდა, როდესაც მოვისმინე, რომ ბიზნეს ასოციაციები და განსაკუთრებით ტურისტული ინდუსტრია და სარესტორნო ინდუსტრია ასეთ რადიკალურ მოთხოვნებს უყენებს მთავრობას. ამის შესახებ ეკონომიკისა და მდგრადი განვითარების მინისტრმა, ნათია თურნავამ განაცხადა.

თურნავას მტკიცებით, მთავრობის მხრიდან კერძო სექტორს, განსაკუთრებით ტურისტულ ბიზნესს კომუნიკაცია არ აკლია, ულტიმატუმის ენით საუბარი კი დიალოგს არ დაეხმარება.

"ჩვენ მაქსიმალურად რაც გვქონდა დაგეგმილი და რაც შევძელით დღეის მდგომარეობით, გავხსენით ძალიან დიდი ბიზნესსფეროები და ბიზნესსაქმიანობები. რასაკვირველია, ბუნებრივია, რომ გარკვეული პაუზა გვაქვს აღებული, რათა გადავხედოთ, თუ როგორ იმოქმედებს ეს საკმაოდ მასშტაბური გახსნები ეპიდემიოლოგიურად და შემდეგ შევძლოთ ასევე ეტაპობრივად, ფრთხილად, ყველა პროტოკოლის დაცვით ვიაროთ წინ. ამას ვაკეთებთ მაშინ, როდესაც ევროპა ემზადება მესამე ტალღისთვის და პირიქით, ჩვენ გვესმის ინფორმაცია უფრო მეტი გამკაცრების შესახებ. კორონავირუსიც არ დამარცხებულა, მიუხედავად იმისა, რომ ვაქცინაცია მალე დაიწყება საქართველოში და დაწყებულია მსოფლიოში. აქედან გამომდინარე, ცოტა არ იყოს გამიკვირდა, როდესაც მოვისმინე, რომ ბიზნეს ასოციაციები და განსაკუთრებით ტურისტული ინდუსტრია და სარესტორნო ინდუსტრია ასეთ რადიკალურ მოთხოვნებს უყენებს მთავრობას. ეს მაშინ, როდესაც წინასწარ გვქონდა ჩვენ შეთანხმებული და სულ რამდენიმე საათში ჩემთან შედგება შეხვედრა სარესტორნო ინდუსტრიისა და მათი გაერთიანებების, სადაც ჩვენ შრომის ინსპექცია გვყავს მოწვეული. წინასწარ შეთანხმებული დღის წესრიგით ვაპირებთ, ვისაუბროთ უფრო სამუშაო ტექნიკურ დეტალებზე. მაგალითად, თუ რა ახალი რეგულაციები შეიძლება იყოს შემოღებული სარესტორნო ინდუსტრიაში იმისთვის, რომ შემდეგ საბჭოს დავუყენოთ საკითხი და ვურჩიოთ, შევძლოთ, გავხსნათ შიდა სივრცეებიც.

აი, ამ თემებზე ვაპირებდით საუბარს. ახლა კი საკმაოდ ულტიმატუმის ტონით დგება ეს ახალი მოთხოვნები, რაც არამგონია, ემსახურებოდეს ამ დიალოგის ინტერესებს. არ ვიცით, ზოგადად, ვის ინტერესებს ემსახურება, რადგან ნამდვილად არ აკლია კერძო სექტორს, განსაკუთრებით ტურისტულ ბიზნესს კომუნიკაცია", - განაცხადა თურნავამ.

შეგახსენებთ, დღეს, ბიზნეს ასოციაციების წარმომადგენლებმა პრემიერ-მინისტრ გახარიას ერთობლივი განცხადებით მიმართეს.

ბიზნესის წარმომადგენლებმა მთავრობას 7 მოთხოვნით და წინადადებით მიმართეს:

1. „კომენდანტის საათის“ დაწყების ვადის გადაწევა 2 საათით, 23:00-დან. ეს მნიშვნელოვნად შეამცირებს ზეწოლას საზოგადოებრივ ტრანსპორტზე პიკურ პერიოდში და ასევე, მისცემს საგრძნობ ეკონომიკურ შედეგს ბიზნეს სექტორს;

2. შაბათ-კვირას მუშაობის შეზღუდვის მოხსნა იმ ბიზნესსექტორებისთვის, რომელთა მუშაობაც ნებადართულია სამუშაო დღეებში. ეს საკითხი განსაკუთრებით კრიტიკულია საცალო სავაჭრო სექტორისთვის, რომლის ბრუნვის 40% სწორედ დასვენების დღეებში გენერირდება;

3. კონკრეტული ანტიკრიზისული პაკეტების დამუშავება დარგობრივი სპეციფიკის გათვალისწინებით, რაც რეალურად მისცემს საშუალებას ცალკეულ დარგებს, ოპერატიულად ამუშავდნენ. მაგალითად, საუბარია სავაჭრო ცენტრებისთვის შეღავათის მიცემაზე 2021 წლის ქონების გადასახადისგან გათავისუფლების კუთხით;

4. 22 თებერვლიდან სარესტორნო/კვების ბიზნესისთვის მუშაობის უფლების მიცემა დახურულ სივრცეებშიც, შესაბამისი მკაცრი რეგულაციის პირობებში, რაზეც დარგის წარმომადგენლებს შემუშავებული აქვთ კონკრეტული წინადადებები;

5. მთის კურორტების გახსნა 22 თებერვლიდან. მიუხედავად ფაქტიურად დასრულებული ზამთრის სეზონისა, სასტუმროებმა და ადგილობრივმა მოსახლეობამ შეძლონ მინიმალური შემოსავლების გენერირება, სრული კოლაფსის და გაკოტრების თავიდან არიდების მიზნით;

6. საქართველოს ბიზნესომბუდსმენის არჩევა და დანიშვნა მოხდეს ბიზნეს სექტორთან პირდაპირი კონსულტაციით და უშუალო მონაწილეობით. ამ მიმართულებით მზად ვართ მონაწილეობა მივიღოთ შესაბამისი მოდელის დამუშავებაში, რაც ასევე გულისხმობს ომბუდსმენის აპარატის საქმიანობის დაფინანსებას ბიზნეს სექტორიდან;

7. მაღალი სოციალური პასუხისმგებლობიდან გამომდინარე, ვაცხადებთ მზაობას, ჩავერთოთ საქართველოში ვაქცინის შემოტანის და სწრაფი ვაქცინაციის პროცესში შესაბამისი ბიზნეს კონტაქტების და ფინანსური რესურსის მოძიება-გამოყენებით.