საქართველოს ეკონომიკისა და მდგრადი განვითარების მინისტრის, ნათია თურნავას განცხადებით, უწყებათაშორისი საბჭო ღამის საათებში გადაადგილების შეზღუდვის მოხსნას ჯერჯერობით არ გეგმავს. ამის შესახებ თურნავამ მთავრობის ადმინისტრაციაში გამართულ ბრიფინგზე განაცხადა.
მისი თქმით, ასეთი მნიშვნელობის გადაწყვეტილების მიღებას წინ ანალიზი უნდა უძღოდეს.
"ერთ-ერთი ყველაზე წონადი ღონისძიება, რაც საბჭოს გადაწყვეტილებით განვახორციელეთ ნოემბერში, ესაა გადაადგილების შეზღუდვა. მე არ დავარქმევდი ამას კომენდანტის საათს, ის გაცილებით უფრო მკაცრი რამაა. ამ გადაწყვეტილების და ამ ზომის გამო ჩვენ დღეს შეგვიძლია, ვილაპარაკოთ შემსუბუქებაზე. ეს იყო ისეთი ამკრძალავი ზომა, რომელმაც მოგვცა პოზიტიური ეფექტი.
რა თქმა უნდა, მის შემსუბუქებაზე, ან გაუქმებაზე მსჯელობას, წინ ძალიან დიდი ანალიზი უნდა უძღოდეს. ჯერჯერობით ამაზე მსჯელობა არაა. ჩვენ ჯერ ვმსჯელობთ შემდეგ ნაბიჯებზე, რადგან დარჩა ჯერ კიდევ ბიზნესები, ბიზნესსექტორები, სადაც შეზღუდვები ჯერ არ შეგვიმსუბუქებია, მაგალითად ფიტნეს ინდუსტრია და სპორტული აქტივობები", - თქვა თურნავამ.
