სახალხო დამცველი გიორგი ტუღუში ტელეკომპანია "თრიალეთის" გენერალური დირექტორის ჯონდო ნანეტაშვილის საქმესთან დაკავშირებით რეაგირებას მთავარ პროკურორს სთხოვს.
როგორც "ჯი-ეიჩ-ენს" სახალხო დამცველის აპარატიდან აცნობეს, გიორგი ტუღუშმა ჯონდო ნანეტაშვილის ახსნა-განმარტება და თანდართული დოკუმენტაცია შემდგომი რეაგირებისთვის საქართველოს მთავარ პროკურორს მურთაზ ზოდელავას გაუგზავნა.
როგორც ცნობილია, 11 ოქტომბერს სახალხო დამცველს ტელეკომპანია "თრიალეთის" გენერალურმა დირექტორმა მიმართა. მისი განმარტებით, 2010 წლის 7 ოქტომბერს, გორში, შიდა ქართლის სამხარეო ადმინისტრაციის წინ, ავტომანქანით მოძრაობისას, ის საპატრულო პოლიციის ეკიპაჟმა გააჩერა.
ნანიტაშვილის ინფორმაციით, საპატრულო პოლიციის თანამშრომლებთან გამართული მოკლე საუბრის შემდეგ, წააქციეს, ერთ ხელზე ბორკილი დაადეს და ფიზიკური შეურაცხყოფა მიაყენეს. ამ დროს საპატრულო პოლიციის მეორე ეკიპაჟიც მოვიდა, რომლის წევრებმაც ასევე მიაყენეს ფიზიკური შეურაცხყოფა.
გორის რაიონული სასამართლოს იმავე დღეს ადმინისტრაციულ სამართალდარღვევათა კოდექსის 173-ე მუხლით და დაედო ადმინისტრაციული სახდელი ჯარიმის სახით 400 ლარის ოდენობით დააკისრა.
სსიპ საქართველოს თავდაცვის სამინისტროს სამხედრო ჰოსპიტალის მიერ 2010 წლის 8 ოქტომბერს გაცემული ჯანმრთელობის მდგომარეობის შესახებ სამედიცინო ცნობის თანახმად, ჯონდო ნანეტაშვილს დიაგნოზად დაესვა ქალა-ტვინის დახურული ტრავმა, თავის ტვინის შერყევა, ხერხემლის კისრის ნაწილის ტრავმა, ტრავმული ცერვიკალგია, ორივე სხივ-მაჯის მიდამოებში ექსკორიაციები.
ამასთან, სს "ზაზა ფანასკერტელის" ქარელის საავადმყოფოს მიერ 2010 წლის 7 ოქტომბერს გაცემული ჯანმრთელობის მდგომარეობის შესახებ სამედიცინო ცნობა შეიცავს დასკვნას, რომლის თანახმადაც ჯონდო ნანეტაშვილს აღენიშნება გულმკერდისა და კისრის არის დაჟეჟილობა, ექსკორაციები ორივე სხივ-მაჯის არეებში და თავის ტვინის შერყევა. დასკვნის მიხედვით, მას აღენიშნება ავადმყოფობის მწვავე მიმდინარეობა.
