- საზოგადოება 01 თებერვალი 2021, 21:36
საქართველო მოსახლეობის 60-70%-ის ვაქცინაციას 2022 წლის ბოლოსკენ შეძლებს - Economist-ი
საქართველოს მოსახლეობის 60-70%-ის ვაქცინაცია 2022 წლის ბოლოსკენ იქნება შესაძლებელი. ეს გათვლები ჟურნალმა Economist-მა გამოაქვეყნა, რომელმაც ქვეყნები დაჰყო 4 კატეგორიად იმის მიხედვით, თუ ვინ როდის მოახერებს მოსახლეობის უმეტესი ნაწილის ვაქცინაციას. ამ დაყოფაში, საქართველო მესამე კატეგორიაში, ნარინჯისფრად აღნიშნული ქვეყნების სიაში მოჰყვა. ამავე კატეგორიაში არიან - ინდოეთი, ჩინეთი, მონღოლეთი, ეგვიპტე, მაროკო და სხვები.
პირველი კატეგორია - მუქი მწვანე ფერით აღნიშნული ქვეყნები მოსახლეობის 60-70 პროცენტის ვაქცინაციას 2021 წლის ბოლომდე შეძლებენ. ამ ქვეყნებში შედიან შეერთებული შტატები, ევროკავშირის ქვეყნები, სინგაპური, ისლანდია და ჰონგკონგი.
მეორე კატეგორია - ღია მწვანე ფერით აღნიშნული ქვეყნები მოსახლეობის უმეტესობის აცრას 2022 წლის შუა პერიოდში მოახერხებენ. ამ კატეგორიაში შედიან - კანადა, მექსიკა, რუსეთი, თურქეთი, ავსტრალია, სამხრეთ აფრიკის რესპუბლიკა, ბრაზილია, არგენტინა და სხვები.
მეოთხე კი წითელი ფერით აღნიშნული ქვეყნები, სადაც მოსახლეობის უმეტესობის აცრას 2023 წლის დასაწყისიდან მოახერხებენ. მათ რიგებში შედიან, უკრაინა, აფრიკის ქვეყნები, ცენტრალური აზიის ქვეყნები, ლათინური ამერიკის ქვეყნები და სხვები.
განვითარებულ ქვეყნებში კორონავირუსის საწინააღმდეგო მასობრივი იმუნიზაციის პროგრამები უკვე დაიწყო, თუმცა მოსახლეობის რაოდენობისა და ლოგისტიკური საკითხების, ასევე ჯანდაცვის სისტემების მომზადების გათვალისწინებით, პროცესის ბოლომდე მიყვანას დრო სჭირდება.
ამ დროისთვის, განვითარებული ქვეყნები კორონავირუსის 3 ვაქცინას იყენებენ - Pfizer/BioNTech (აშშ-გერმანია), Moderna (აშშ) და AstraZeneca-Oxford (დიდი ბრიტანეთი).
გარდა ამისა, ერთ-ერთ დამაბრკოლებელ გარემოებას ვაქცინის წარმოება და წარმოების სიჩქარე წარმოადგენს, რადგან ზოგიერთმა განვითარებულმა ქვეყანამ ფარმაცევტულ კომპანიებს იმაზე მეტი დოზა შეუკვეთა, ვიდრე საჭირო იყო.
ამასთან, გასათვალისწინებელია იმუნიზაციის პროგრამის განხორციელებასთან დაკავშირებული ხარჯები, რომელიც განსაკუთრებულ პრობლემას განვითარებადი ქვეყნებისთვის წარმოადგენს.
საკუთარ ვაქცინას აწარმოებენ ინდოეთი და ჩინეთი. მიუხედავად ამისა, მრავალრიცხოვანი მოსახლეობის გამო, მოსალოდნელია, რომ ინდოეთსა და ჩინეთში მოსახლეობის იმუნიზაციის პროგრამა 2022 წლის ბოლომდე გასტანს.
ღარიბ ქვეყნებში კი მოსახლეობის უმეტესობის ვაქცინაციას 2023 წლის ბოლომდე ვერ შეძლებენ.
