"მოძრაობა სამართლიანი საქართველოსთვის" ლიდერი ზურაბ ნოღაიდელი თვითმმართველობის არჩევნებში მონაწილეობას გეგმავს როგორც რეგიონებში, ასევე დედაქალაქში. ამის შესახებ ინფორმაციას რადიო "ჰერეთი" ავრცელებს.
მისი განცხადებით, მიხეილ სააკაშვილის რეჟიმი დღევანდელი საარჩევნო გარემოს ფონზედაც კი არჩევნებს ვეღარ მოიგებს. როგორც მოძრაობის ლიდერმა განაცხადა, არჩევნებში გამარჯვებისთვის იბრძოლებს ყველა ფორმით, რაც კანონმდებლობით დაშვებულია.
"არ მაქვს იმის ილუზია, რომ საარჩევნო გარემო გაუმჯობესდება, პირიქით, ჩვენი საფიქრალი ის არის, გარემო არ გაუარესდეს. სააკაშვილი არჩევნებს ვეღარ მოიგებს საქართველოში. ის ცდილობს საარჩევნო სისტემა მოირგოს საკუთარ თავზე, ამიტომ დროის დაკარგვა საარჩევნო სისტემის გაუმჯობესებაზე არამართებულად მიმაჩნია. ყველა იმ მოლაპარაკებების პროცესი, რომელში მონაწილეობასაც სააკაშვილი გვთავაზობდა, კონტრპროდუქტიულია ჩემთვის. კარგად ვნახეთ, საკონსტიტუციო კომისიის შექმნის შემდეგ სამი საკონსტიტუციო ცვლილება ისე მიიღო, რომ კომისიისთვის ერთი რჩევაც კი არ უკითხავს. ზუსტად ასევე მოიქცევა სააკაშვილი საარჩევნო კანონმდებლობაზე, ამიტომ ამ პროცესებში მონაწილეობას არ მივიღებთ", - განაცხადა მან.
