დონალდ ტრამპი, რომლის უფლებამოსილების ვადაც რამდენიმე საათში ამოიწურება, თავის ახლო გარემოცვის წევრებთან ახალი პარტიის დაფუძნების შესაძლებლობას განიხილავს. ამის შესახებ გავლენიანი ამერიკული გამოცემა Wall Street Journal-ი იტყობინება.
გავრცელებული ინფორმაციით, დონალდ ტრამპი ფიქრობს, ახალ პარტიას "პატრიოტთა პარტია" უწოდოს.
სავარაუდოდ, დონალდ ტრამპის მცდელობებს ახალი პარტიის შექმნის შესახებ, რესპუბლიკური პარტია სერიოზულ წინააღმდეგობას გაუწევს, რომელიც ამომრჩეველთა ნაწილის დაკარგვის წინაშე აღმოჩნდება.
ბოლო დღეებში, ტრამპს წამყვან რესპუბლიკელ ლიდერებთან ურთიერთობები დაეძაბა, მათ შორის სენატის რესპუბლიკელთა ლიდერ მიჩ მაკკონელთან, რომელმაც გუშინდელ სენატის სხდომაზე, ტრამპი ღიად დაადანაშაულა კაპიტოლიუმზე მომხდარი თავდასხმის პროვოცირებაში.
საგულისხმოა, რომ ტრამპი ინარჩუნებს მხარდაჭერას რესპუბლიკური პარტიის ტრადიციულ ამომრჩევლებს შორის.
თეთრმა სახლმა გავრცელებულ ინფორმაციასთან დაკავშირებით კომენტარის გაკეთება არ ისურვა.