ნიდერლანდების სამეფოს მთავრობა, პრემიერ-მინისტრ მარკ რუტეს ხელმძღვანელობით, გადადგა. ამის შესახება საგანგებო პრესკონფერენციაზე პრემიერ-მინისტრმა რუტემ განაცხადა.
მისივე თქმით, მთავრობის გადადგომის შესახებ ოფიციალურად ეცნობა ნიდერლანდების მონარქს, ვილემ ალექსანდერს.
"სახელმწიფომ ვერ შეასრულა თავისი ვალდებულებები იმ ადამიანების დასაცავად, ვისაც ეს სჭირდებოდა. სერიოზული მარცხი ვიწვნიეთ. უდანაშაულო ადამიანები კრიმინალებად შერაცხეს, რამაც შეიწირა მათი სიცოცხლე, ხოლო პარლამენტი არასწორად იყო ინფორმირებული ამის შესახებ", - განაცხადა მარკ რუტემ.
გასული წლის დეკემბრის შუა რიცხვებში, საპარლამენტო კომიტეტმა გამოაქვეყნა გამოძიების შედეგები, რომლის თანახმად, ნიდერლანდები სახელმწიფო საგადასახადო ადმინისტრაციამ მრავალი მშობელი არასწორად დაადანაშაულა ბავშვთა დახმარების სისტემის ბოროტად გამოყენებაში.
დოკუმენტში აღნიშნულია, რომ სულ მცირე 9 ათასი ოჯახის მიმართ სახელმწიფო ორგანოების მიერ არასწორი გადაწყვეტილება იქნა მიღებული.
ნიდერლანდების საგადასახადო ორგანოებმა ათასობით ოჯახს დაავალა, საარსებო შემწეობის ფარგლებში მიღებული თანხები უკან ხაზინაში დაებრუნებინა, რამაც უამრავი ადამიანი უკიდურესად მძიმე ფინანსურ მდგომარეობაშოი ჩააგდო, ადამიანებმა დაკარგეს ქონება, სამსახურები და ზოგიერთ შემთხვევაში შვილებზე მეურვებაც კი.