"დამოუკიდებელი საქართველოს სამივე პრეზიდენტი - ზვიად გამსახურდია, ედუარდ შევარდნაძე და მიხეილ სააკაშვილი და მათი პარლამენტები მორჩილი საპარლამენტო უმრავლესობით ერთმანეთს ჰგვანან", _ ამის შესახებ "ჯი-ეიჩ-ენს" საქართველოს ყოფილი პრეზიდენტების ზვიად გამსახურდიას და ედუარდ შევარდნაძის მთავრობების ექს-პრემიერმინისტრმა თენგიზ სიგუამ განუცხადა.
"20 წლის წინ საქართველოს პარლამენტი ძალიან რთულ მდგომარეობაში აღმოჩნდა, რადგანაც არჩევნების ჩატარების შემდეგ საკანონმდებლო ორგანოში პოლიტიკურად გაუნათლებელი და უვიცი ხალხი მოხვდა, რომელთა უმრავლესობას ტერმინ პოლიტიკის განმარტებაც არ ესმოდა. მას შემდეგ ბევრი რამ შეიცვალა. მაშინ თუ პოლიტიკაში ქვეყნის მოსახლეობის მხოლოდ 5% ერკვეოდა, ახლა მათი რაოდენობა 25-30%-ს აღწევს. დღევანდელ პარლამენტში ინტელექტის დონეც გაზრდილია", - აღნიშნა სიგუამ.
მისი თქმით, პირველი მოწვევის პარლამენტარები ერთმანეთისგან საგარეო და საშინაო პოლიტიკას ვერ ასხვავებდნენ, რაც შეეხება ეკონომიკას, მისი განმარტებაც კი არ იცოდნენ.
"ერთხელ ჩემს კაბინეტში ერთ-ერთი პარლამენტარი შემოვიდა და მითხრა, რუსეთს ღვინო ხორბალში გავუცვალოთ, მაგრამ მხოლოდ იმ შემთხვევაში, თუ ერთ ლიტრში ერთ ტონა ხორბალს მოგვცემენო. გამოდიოდნენ ინიციატივით, მაგალითად, ტერმინი კოსმოსი ამოეღოთ ხმარებიდან და ცათაცა შემოეღოთ, ვიოლინოსთვის ყელფანდურა ეწოდებინათ. საბედნიეროდ, დღეს ასეთი ინიციატივები აღარ ისმის, თუმცა სამივე პრეზიდენტის დროს არჩეული პარლამენტი ერთმანეთს იმით ჰგავს, რომ მორჩილი უმრავლესობა ჰყავს. ასე კი მაშინ ხდება, როცა ქვეყანას ქარიზმატული პირები მართავენ", - აღნიშნა "ჯი-ეიჩ-ენთან" საუბრისას ექს-პრემიერმა.
შეგახსენებთ, რომ 20 წლის წინ, 1990 წლის 28 ოქტომბერს, საქართველოში პირველი დემოკრატიული და მრავალპარტიული არჩევნები ჩატარდა, რომელშიც მაშინ მოქმედი პრეზიდენტის, ზვიად გამსახურდიას პარტიამ - "მრგვალი მაგიდა - თავისუფალი საქართველო" გაიმარჯვა.
