ეროვნულ-განმათავისუფლებელი მოძრაობის ერთ-ერთი ლიდერის, ირაკლი ბათიაშვილის შეფასებით, 20 წლის წინ ჩატარებული პირველი მრავალპარტიული საპარლამენტო არჩევნებით საქართველოში კომუნისტური რეჟიმის დემონტაჟი დაიწყო. ამის შესახებ ბათიაშვილმა "ჯი-ეიჩ-ენთან" საუბარში 1990 წლის 28 ოქტომბრის საპარლამენტო არჩევნების კომენტირებისას განაცხადა.

"ეს იყო ძალიან მნიშვნელოვანი მოვლენა, რადგან სწორედ ამ არჩევნების შემდეგ დაიწყო საქართველოში საბჭოთა სისტემის დემონტაჟი. არჩეულ იქნა უზენაესი საბჭო და მრგვალი მაგიდა. ამას მოჰყვა 9 აპრილის დამოუკიდებლობის დეკლარაცია, მანამდე ჩატარებული რეფერენდუმი, სადაც მოსახელობის აბსოლუტურმა ნაწილმა მხარი დაუჭირა საქართველოს დამოუკიდებლობას. ამ ყველაფრის ათვლის წერტილი, რა თქმა უნდა, იყო ეროვნული მოძრაობა, რომელიც 80-იან წლებში დაიწყო. 1990 წლის 28 ოქტომბრის არჩევნებიდან კი იწყება საქართველოდან კომუნისტური რეჟიმის გასვლა და სისტემის დემონტაჟი", - განაცხადა ბათიაშვილმა "ჯი-ეიჩ-ენთან" საუბარში.

შეგახსენებთ, რომ 20 წლის წინ, 1990 წლის 28 ოქტომბერს, საქართველოში პირველი დემოკრატიული და მრავალპარტიული არჩევნები ჩატარდა, რომელშიც გაიმარჯვა მაშინ მოქმედი პრეზიდენტის, ზვიად გამსახურდიას პარტიამ - "მრგვალი მაგიდა - თავისუფალი საქართველო".