ამერიკის შეერთებული შტატების პირველმა ლედიმ, მელანია ტრამპმა გასულ კვირას, ვაშინგტონში, კაპიტოლიუმის შენობაში ძალადობრივი შეტევა დაგმო.
"მე მკაცრად ვგმობ ძალადობრივ ქმედებებს, რომლებიც კაპიტოლიუმში მოხდა. ძალადობა მიუღებელია", - განაცხადა აშშ-ის პრეზიდენტის მეუღლემ თავის განცხადებაში.
მელანია ტრამპის განცხადებით, ის იმედგაცრუებულია და შეწუხებულია იმ ფაქტით, რაც ვაშინგტონში მოხდა.
მან ასევე მწუხარება გამოთქვა, კაპიტოლიუმში შეჭრის დროს პოლიციელებისა და დემონსტრანტების დაღუპვის გამო.
გარდა ამისა, მელანია ტრამპმა მადლობა გადაუხადა მილიონობით ამერიკელს, რომლებიც მხარს უჭერდნენ დონალდ ტრამპს, მისი პრეზიდენტობის განმავლობაში.
"ჩემთვის განსაკუთრებული პატივი იყო ამერიკის პირველი ლედობა", - დასძინა მელანია ტრამპმა.
შეგახსენებთ, 6 იანვარს დონალდ ტრამპის მომხრეები შეიჭრნენ კონგრესის შენობაში, სადაც არჩეული პრეზიდენტის ჯო ბაიდენის საპრეზიდენტო არჩევნებში გამარჯვების დადასტურების პროცესი მიმდინარეობა. არეულობის შედეგად სულ მცირე 5 ადამიანი დაიღუპა.
კონგრესზე ძალადობრივი იერიშის გამო, წარმომადგენელთა პალატისა და სენატის სხდომა შეწყდა, რომელიც მოგვიანებით განახლდა.
