აშშ-ის კონგრესის წარმომადგენელთა პალატის სპიკერმა ნენსი პელოსიმ აშშ-ის ვიცე-პრეზიდენტს მაიკ პენსს ამერიკის კონსტიტუციის 25-ე შესწორების ამოქმედებისა და პრეზიდენტ დონალდ ტრამპის თანამდებობიდან გადაყენებისკენ მოუწოდა.
"მე ვუერთდები სენატის დემოკრატების ლიდერს და მოვუწოდებს ვიცე-პრეზიდენტ მაიკ პენსს, დაუყოვნებლივ იმოქმედოს კონსტიტუციის 25-ე შესწორებით და თანამდებობას ჩამოაშოროს დონალდ ტრამპი", - განაცხადა ნენსი პელოსიმ კაპიტოლიუმის შენობაში გამართულ პრესკონფერენციაზე.
ნენსი პელოსის თქმით, თუ მაიკ პენსი უარს იტყვის 25-ე შესწორების ამოქმედებაზე, მაშინ კონგრესი კვლავ შეიკრიბება, რათა ტრამპის იმპიჩმენტზე იმსჯელოს.
მანამდე მაიკ პენსს 25-შესწორების ამოქმედებისკენ სენატის დემოკრატების ლიდერმა ჩაკ შუმერმაც მოუწოდა.
დემოკრატი სენატორის თქმით, ის რაც კაპიტოლიუმის შენობაში მოხდა, ამერიკის წინააღმდეგ აჯანყება იყო.
"ის, რაც გუშინ კაპიტოლიუმის შენობაში მოხდა იყო აჯანყება ამერიკის შეერთებული შტატების წინააღმდეგ, რომელიც დონალდ ტრამპის მიერ იყო პროვოცირებული. ეს პრეზიდენტი არცერთი დღით არ უნდა დარჩეს თანამდებობაზე", - განაცხადა ჩაკ შუმერმა.
სენატორ შუმერის თქმით, თუ მაიკ პენსი და ამერიკის მთავრობის კაბინეტის წევრები თანამდებობიდან არ ჩამოაშორებენ ტრამპს, მაშინ კონგრესი დაუყოვნებლივ უნდა შეიკრიბოს, რათა დონალდ ტრამპს იმპიჩმენტი გამოუცხადოს.
ამერიკის კონსტიტუციის 25-ე შესწორების მიხედვით, მთავრობის კაბინეტის წევრებს, ვიცე-პრეზიდენტთან ერთად შეუძლიათ მიმართონ კონგრესის ორივე პალატის ლიდერს, რომ პრეზიდენტი ქმედუუნაროა და არ ძალუძს კონსტიტუციით გათვალისწინებული მოვალეობების შესრულება.
დონალდ ტრამპის თამდებობიდან გადაყენებას ითხოვს რესპუბლიკელი კონგრესმენი ადამ კინზინგერიც.