შეერთებული შტატების კონგრესის წარმომადგენელთა პალატამ პრეზიდენტო დონალდ ტრამპის ვეტო, რომელიც მან "2021 წლის ეროვნული თავდაცვის ავტორიზაციის აქტს" დაადო, დაძლია.
წარმომადგენელთა პალატაში ვეტოს დაძლევას 322-მა კონგრესმენმა დაუჭირა მხარი, 87 - წინააღმდეგ წავიდა.
წარმომადგენელთა პალატის მიერ ვეტოს დაძლევის შემდეგ, კანონპროექტი სენატში გადაიგზავნება, სადაც კენჭი ეყრება ვეტოს დაძლევის საკითხს.
გასულ კვირას, დონალდ ტრამპმა ვეტო დაადო 740-მილიარდიანი ეროვნული თავდაცვის ავტორიზაციის აქტს, რომელიც კონგრესის ორივე პალატამ მიიღო და ხელმოსაწერად პრეზიდენტს გადაუგზავნა.
"ადმინისტრაცია აცნობიერებს კანონპროექტის მნიშვნელობას ჩვენი ეროვნული უსაფრთხოებისათვის. სამწუხაროდ, დოკუმენტი არ შეიცავს ეროვნული უსაფრთხოების მნიშვნელოვან დებულებებს. შეიცავს მუხლებს, რომლებიც შეურაცხყოფს ჩვენს ვეტერანებს და სამხედრო ისტორიას, ეწინააღმდეგება ადმინისტრაციის ძალისხმევას, უზრუნველყოს შეერთებული შტატების წამყვანი პოზიციები ეროვნული უსაფრთხოებისა და საგარეო პოლიტიკის სფეროში. ეს საჩუქარია ჩინეთისა და რუსეთისთვის", - განაცხადა დონალდ ტრამპმა.
როგორც მოსალოდნელი იყო, პრეზიდენტმა გააკრიტიკა ბიუჯეტის პროექტი, რომელიც არ აუქმებს 1996 წლის "კომუნიკაციების სფეროში ეთიკის აქტის" 230-ე ნაწილს. ეს ნაწილი ტექნოლოგიურ კომპანიებს იცავს იურიდიული პასუხისმგებლობისგან მომხმარებლის მიერ ინფორმაციის გამოქვეყნების, ამოღების ან სხვაგვარად მოდერაციისთვის.
"230-ე ნაწილი ხელს უწყობს უცხოური დეზინფორმაციის გავრცელებას ინტერნეტით, რაც სერიოზულ საფრთხეს უქმნის ეროვნულ უსაფრთხოებას და არჩევნების სამართლიანობას. ის უნდა გაუქმდეს", - თქვა ტრამპმა.
ტრამპი ეწინააღმდეგება, ამერიკულ სამხედრო ბაზებისთვის კონფედერაციის ლიდერების სახელების გადარქმევას.
დონალდ ტრამპმა ასევე გააკრიტიკა ის პუნქტებს, რომლებიც ეხება ავღანეთში, კორეის რესპუბლიკასა და გერმანიაში აშშ-ის ჯარების რაოდენობის შემცირების შეზღუდვებს.
"უამრავი დებულება პირდაპირ ეწინააღმდეგება ჩემი ადმინისტრაციის საგარეო პოლიტიკას, განსაკუთრებით ჩვენს ძალისხმევას სამხედრო მოსამსახურეების სახლში დაბრუნების შესახებ", - თქვა პრეზიდენტმა.
შეგახსენებთ, ეროვნული თავდაცვის ავტორიზაციის აქტში საუბარია საქართველოს მხარდაჭერაზეც.
დოკუმენტში აღნიშნულია, რომ რუსეთთან სტრატეგიული კონკურენციისა და მასთან დაკავშირებული ქმედებების თვალსაზრისით, რუსეთის მხრიდან აგრესიის შესაკავებლად, აშშ-ის თავდაცვის დეპარტამენტმა უნდა გაზარდოს "ყურადღება და შავი ზღვის რეგიონში ცვალებად სამხედრო ბალანსზე რესურსები მიმართოს, ასევე, გაზარდოს ნატო-სა და სხვა მრავალმხრივი სწავლებების სიხშირე და მასშტაბი შავი ზღვის რეგიონში. მათ შორის, უკრაინისა და საქართველოს მონაწილეობით".
დოკუმენტი ასევე გაზსადენების "ჩრდილოეთ ნაკადის 2-ისა" და "თურქული ნაკადის" წინააღმდეგ სანქციების გაფართოებას ითვალისწინებს.
