შეერთებულმა შტატებმა ბელარუსის წინააღმდეგ დაწესებული სანქციები გააფართოვა.
შშ-ის ხაზინისა და სახელმწიფო დეპარტამენტებმა სანქციები დაუწესეს ოფიციალურ პირებსა და ორგანოებს, რომლებიც სავარაუდოდ პასუხისმგებელნი არიან 9 აგვისტოს ჩატარებულ საპრეზიდენტო არჩევნებსა და სამართალდამცავი ორგანოების მხრიდან მომიტინგეების მიმართ განხორციელებულ ძალადობაზე.
"ბელარუსი ხალხი ეძიებს მშვიდობიან გზას თავისი ძირითადი დემოკრატიული უფლებების იმპლემენტაციისთვის, რაზეც სახელმწიფო მუდმივად ძალადობრივი მეთოდებით პასუხობს", - ამბობს აშშ-ის ხაზინის მდივანი სტივენ მნუჩინი გავრცელებულ განცხადებაში.
სანქციები დაუწესდა ბელარუსის ცენტრალურ საარჩევნო კომისიას, რომელმაც, მიუხედავად იმისა, რომ "უამრავი დარღვევა დაფიქსირდა როგორც არჩევნების დღეს, ასევე წინასაარჩევნო პერიოდში, რაც პროცესს არც თავისუფალს და არც სამართლიანს ხდიდა, მათ შორის ოპოზიციის კანდიდატების აკრძალვა, დამკვირვებლების შეზღუდვა, არჩევნების შედეგები მაინც შეაჯამა".
სანქცირებულთა სიაში მოხვდნენ ასევე მინსკის სპეციალური დანიშნულების სამმართველოს მთავარი განყოფილება (ე.წ. ომონი), შინაგან საქმეთა მთავარი სამმართველოს მინსკის აღმასრულებელი კომიტეტი და ბელარუსის სახელმწიფო უშიშროების სამსახურის სპეცდანაყოფი "ალფა".
ხაზინის დეპარტამენტმა სანქციები დაუწესა ასევე ბელარუსის შინაგან საქმეთა მინისტრის პირველ მოადგილესა და ეროვნული პოლიციის უფროსს, ჰენაძ კაზაკევიჩს.
ხაზინის დეპარტამენტის მიერ დაწესებული სანქციები გულისხმობს აქტივების გაყინვას და სანქცირებულ პირებთან ამერიკელების ურთიერთობების აკრძალვას.
გარდა ამისა, აშშ-ის სახელმწიფო დეპარტამენტის მიერ გამოვლენილ იქნა 39 პირი, რომელთაც "პირდაპირი კავშირი აქვთ ბელარუსში დემოკრატიული პროცესების ძირის გამოთხრაში". სახელმწიფო დეპარტამენტმა ამ პირებს, რომელთა ვინაობა არ გამჟღავნებულა, სავიზო აკრძალვები დაუწესა.
მანამდე ვაშინგტონმა, ევროკავშირის, დიდი ბრიტანეთისა და კანადის მიერ დაწესებული სანქციების კვალდაკვალ, ბელარუსის შინაგან საქმეთა მინისტრსა და კიდევ 7 მაღალჩინოსანს დაუწესა სანქციები.
შეგახსენებთ, ბელარუსის წინააღმდეგ დაწესებული სანქციები 18 დეკემბერს ევროკავშირმაც გააფართოვა.
ბელარუსის მოქმედი პრეზიდენტი ალიაქსანდრ ლუკაშენკა, რომელიც 26 წელია ხელისუფლების სათავეშია, აცხადებს, რომ 9 აგვისტოს საპრეზიდენტო არჩევნებში გაიმარჯვა ხმების 80 პროცენტით. ევროკავშირი და დასავლეთის ქვეყნების უმეტესობა არ ცნობენ არჩევნების შედეგებს და ლუკაშენკას ლეგიტიმურ პრეზიდენტად არ აღიარებენ.
