ბრიტანეთში კორონავირუსის ახალი სახეობის მზარდი გავრცელების ფონზე, იზრდება ევროკავშირის ქვეყნების რაოდენობა, რომლებმაც ბრიტანეთთან სამოგზაურო აკრძალვები დააწესეს.
ამ დროისთვის, ბელგიამ და ნიდერლანდებმა უკვე აკრძალეს ავიარეისები ბრიტანეთიდან.
იტალიის საგარეო საქმეთა მინისტრმა აღნიშნა, რომ მისი მთავრობაც გეგმავს ფრენების აკრძალვას. გავრცელებული ინფორმაციით, საფრანგეთი და გერმანია გეგმავენ მსგავს მოქმედებას.
ბრიტანეთში შეშფოთებულები არიან კორონავირუსის ახალი ვარიანტის გამო, რომელიც სწრაფად ვრცელდება. ამ ფონზე პრემიერ-მინისტრმა, ბორის ჯონსონმა განაცხადა, რომ ქვეყანაში, ინგლისის სამხრეთ აღმოსავლეთ ნაწილში, მათ შორის ლონდონში, 20 დეკემბრიდან ე.წ კოვიდ-განგაშის ახალი, მეოთხე დონის სისტემა Tier Four ამოქმედდება
შეზღუდვები 16 მილიონზე მეტ ადამიანს შეეხება.
ვირუსის მუტაცია პირველად სექტემბრის შუა რიცხვებში აღმოაჩინეს, ინგლისის სამხრეთ-აღმოსავლეთში და მას შემდეგ ის ვირუსის დომინანტურ ფორმად იქცა ლონდონში და ინგლისის სამხრეთ-აღმოსავლეთისა და აღმოსავლეთის რეგიონებში.
შეზღუდვების მეოთხე დონის ამოქმედების შემდეგ იკრძალება რეგიონის დატოვება ან მასში შესვლა. მოქალაქეებს ეკრძალებათ სახლის დატოვება განსაკუთრებული საჭიროების გარეშე. ადამიანებს, რომლებიც ერთად არ ცხოვრობენ, შეხვედრის უფლება მხოლოდ ღია ცის ქვეშ აქვთ. მუშაობას აგრძელებს მხოლოდ პირველადი დანიშნულების მაღაზიები და აფთიაქები. გარდა ამისა, საშობაოდ დაგეგმილი შეზღუდვების შემსუბუქება გაუქმდა.
ჯონსონი და ბრიტანელი მეცნიერები აცხადებენ, რომ ვირუსის ახალი ვარიანტი ორიგინალურ ვერსიასთან შედარებით დაახლოებით 70 პროცენტით უფრო სწრაფად ვრცელდება.
ახალი შეზღუდვები ძალაში, სულ მცირე, ორი კვირა გაგრძელდება.
20 დეკემბრიდან შეზღუდვების მეოთხე დონე ძალაში შევა უელსში, 26 დეკემბრიდან - შოტლანდიაში.
დიდი ბრიტანეთი პირველი ქვეყანაა, სადაც მოსახლეობის კორონავირუსზე აცრა დაიწყო. Pfizer/BioNTech-ის ვაქცინით, რომელიც 95%-ით ეფექტიანია, ვაქცინაციის პროცესი დიდი ბრიტანეთში 8 დეკემბერიდან მიმდინარეობს.
