მისი თქმით, იმ თბილისელების საკუთრებასთან დაკავშირებული საკითხები, რომელთა მიწებზედაც მოხდება რკინიგზის გაყვანა, ბუნდოვანი რჩება. ხიდაშელის განმარტებით, თბილისის შემოვლით რკინიგზას ე. წ. A კატეგორია აქვს მინიჭებული EBღD-ის მიერ, რაც ნიშნავს, რომ იგი სერიოზულ სოციალურ ზემოქმედებას ახდენს და განსაკუთრებული ღონისძიებები უნდა გატარდეს იმ მოსახლეობის დასაკმაყოფილებლად, ვის საკუთრებასაც ტრასა შეეხება, რაც საქართველოში არ ხდება.

"მაგალითად; თბილისის ზღვის ჩრდილოეთ სანაპიროს მიმდებარე ტერიტორიაზე, რომლის ნაწილიც გლდანი-ნაძალადევის ტერიტორიას ეკუთვნის, დადგენილია ნორმატიული ფასი და ის 20 ლარით განისაზღვრება, თუმცა ამის მიუხედავად მოსახლეობისათვის შეთავაზებულია 6 ლარი. ფასის უსამართლობა დგინდება არა მხოლოდ იმ დისპროპორციით, რომელიც მიწის ნორმატიულ, საბაზრო და შეთავაზებულ ფასს შორის არსებობს, არამედ იმითაც, რომ კომპენსაციის მიღების შემდეგ მოქალაქემ უნდა შეძლოს ანალოგიური ტიპის მიწის შეძენა, რაც ბუნებრივია თბილისში დღეს შეუძლებელია 6-ლარიანი გაანგარიშებით", - განაცხადა ხიდაშელმა.

მისი თქმით, ამავე ტერიტორიაზე საბაზრო ფასის დასადგენად "რესპუბლიკელებმა" მთელი რიგი სამუშაო განახორციელეს და დაადგინეს, რომ უძრავი ქონების სააგენტოს და სხვადასხვა სპეციალური დაწესებულების მიერ საჯაროდ გამოქვეყნებული ინფორმაციის შესაბამისად, თბილისის ზღვის ჩრდილოეთ სანაპიროს მიმდებარე ტერიტორიაზე, მიწის შეთავაზების მინიმალური ფასი 10 აშშ დოლარია, ხოლო საშუალო ფასი 15-იდან 20 დოლარამდე მერყეობს.

"შესაბამისად, ადამიანები დარჩენილი არიან არჩევნის გარეშე და ალტერნატივა მათ წინაშე ასეთია: ან დასთანხმდებიან 6 ლარს, რაც რეალურ ღირებულებაზე 3-4-ჯერ ნაკლებია, ან ერთ დღეს ექსპროპრიაციის აქტი გამოიცემა სააკაშვილის მიერ, მათ აღარავინ დაელაპარაკება ფასზე და ამ მიწის ნაკვეთებს ჩამოართმევენ იმპერატიულად", - აღნიშანა ხიდაშელმა.