ვარშავის სააპელაციო სასამართლომ პირველი ინსტანციის სასამართლოს გადაწყვეტილება ჩეჩნეთის დევნილობაში მყოფი მთავრობის ექს-პრემიერმინისტრის, აჰმედ ზაკაევის დაპატიმრების შესახებ გააუქმა და მისი დაკავების შესახებ საქმე შეწყვიტა.
მეორე ინსტანციის სასამართლოს სხდომა დღეს დახურულ რეჟიმში მიმდინარეობდა. ინფორმაციას ამის შესახებ რუსული მედია ავრცელებს.
მათი ინფორმაციით, თავად ზაკაევი სასამართლოზე არ გამოცხადებულა. მისი ადვოკატის განმარტებით, ზაკაევმა ვერ მოასწრო დიდ ბრიტანეთში ახალი დოკუმენტების გაფორმება, ვინაიდან დევნილის პასპორტში ახალი ვიზის ჩასაკრავი ადგილი არ დარჩა.
სააპელაციო სასამართლოს გადაწყვეტილება საბოლოოა.
შეგახსენებთ, რომ აჰმედ ზაკაევი, რომელიც პოლონეთში ჩეჩენი ხალხის მსოფლიო კონგრესზე დასასწრებად იყო ჩასული, პოლონეთის სამართალდამცავებმა მიმდინარე წლის 17 სექტემბერს დააპატიმრეს. 22 სექტემბერს ვარშავის პროკურატურამ რუსეთიდან მიიღო მოთხოვნა ზაკაევის რუსეთში ექსტრადაციის შესახებ. ამის შემდეგ რუსულმა მხარემ ზაკაევის პოლონეთში 40 დღე-ღამის განმავლობაში დაპატიმრება მოითხოვა. ვარშავის სასამართლომ პროკურატურის ეს მოთხოვნა არ დააკმაყოფილა.
სასამართლოს შენობის დატოვების შემდეგ ზაკაევმა ჩეჩენი ხალხის კონგრესში მონაწილეობა მიიღო და ლონდონში გაემგზავრა. გამგზავრების წინ კი განაცხადა, რომ მზადაა პოლონეთში დაბრუნდეს მაშინვე, როგორიც კი მის გამოცხადებას სასამართლო მოითხოვს.
