საქართველოს პარლამეტის თავმჯდომარის დავით ბაქრაძის განმარტებით, შესაბამისი კომიტეტები ინიციატივას უახლოესი ორ კვირის განმავლობაში მოამზადებენ რის შემდეგაც პარლამენტი ინიციატივის განხილვას დაიწყებს.

ბაქრაძის თქმით, მედიასაშუალებების მფლობელთა ვინაობა და მათი დაფინანსების გზები გამჭვირვალე გახდება. მისივე განმარტებით, ამ მიმართულებით საქართველო გადადის იმ სტანდარტზე, რომელიც აშშ-ში, დიდ ბრიტანეთსა და სხვა განვითარებულ ქვეყანაში მუშაობს.

"საყოველთაოდ არის აღიარებული, რომ საზოგადოებას უნდა ჰქონდეს ინფორმაცია ვინ არის მედიასაშუალებების მფლობელი, რა ინტერესებს ემსახურება ესა თუ ის ადამიანი, ან ჯგუფი და როგორ ხდება მედიასაშუალების დაფინანსება. ამ მიმართულებით საქართველოში დღემდე მოქმედებს სტანდარტი, რომელიც მუშაობს მსოფლიოს ძალიან ბევრ ქვეყანაში, მაგრამ ჩვენი ამოცანა არ არის ვიყოთ ბევრიდან ერთ-ერთი, ჩვენი ამოცანაა ყველგან, სადაც ვართ ვიყოთ მოწინავე რიგებში. ამიტომ. მე დღეს ვახმოვანებ ინიციატივას, რომ საქართველოში დაიწყოს მუშაობა ახალი სტანდარტის შექმნაზე - იმ სტანდარტის, რომელიც მუშაობს აშშ-ში დიდ ბრიტანეთში, ევროპის სხვა მოწინავე ქვეყნებში იმ სტანდარტის, რომელიც არის ყველაზე მაღალი დემოკრატიული ხარისხის და რომელიც ითვალისწინებს ქართული საზოგადოებისთვის სრული და ამომწურავი ინფორმაციის მიღებას თუ ვინ არის საქართველოში მოქმედი მედიასაშუალებების მფლობელი", - განაცხადა ბაქრაძემ და დასძინა, რომ აღნიშული ინიციატივა მნიშვნელოვანია მედიის დამოუკიდებლობისთვის და "ეს იქნება ძალიან სერიოზულად წინ გადაგმული ნაბიჯი ქვეყანაში მედიადამოუკიდებლობის გაუმჯობესებისკენ".

მანვე, იურიდიულ საკითხთა და დარგობრივი ეკონომიკის კომიტეტებს სთხოვა უახლოესი ორი კვირის განმავლობაში მოამზადონ შესაბამისი საკანონმდებლო ინიციატივა. დავით ბაქრაძემ იმედი გამოთქვა, რომ ხსენებულ ინიციატივას მხარს დაუჭერენ თავად მედიასაშუალებების მფლობელები და პოლიტიკური პარტიები.

"ორი კვირის შემდეგ ეს ინიციატივა უკვე დარეგისტრირდება პარლამენტის ბიუროზე ამის შემდეგ დაიწყება განხილვა და იმედი მაქვს სხვადასხვა პოლიტიკური ძალები, უმრავლეობა ასევე უმცირესობა და სხვა პოლიტიკური პარტიები მხარს დაუჭერენ წარმოდგენილ ინიციატივას", - აღნიშნა ბაქრაძემ.