გთხოვთ, დაპირებისამებრ განახორციელოთ წერტილოვანი შეზღუდვები და გააუქმოთ ინდუსტრიის ჩაკეტვა - ტურიზმის ინდუსტრიის ალიანსი პრემიერ-მინისტრს

ეკონომიკა 30 ნოემბერი 2020, 14:47

გთხოვთ, დაპირებისამებრ განახორციელოთ წერტილოვანი შეზღუდვები და გააუქმოთ ინდუსტრიის ჩაკეტვა - ტურიზმის ინდუსტრიის ალიანსი პრემიერ-მინისტრს

საქართველოს ტურიზმის ინდუსტრიის ალიანსი (სტია) ქვეყნის პრემიერ-მინისტრს მიმართავს. როგორც სტია-ს მიერ გავრცელებული განცხადებიდან ირკვევა, ალიანსი გიორგი გახარიას სთხოვს, რომ მთავრობის ეკონომიკურ გუნდსა და ტურიზმის ინდუსტრიის ალიანსს შორის წარიმართოს პრობლემებზე უფრო ღრმად ორიენტირებული და ეფექტური დიალოგი, რათა ერთიანი ძალებით მოხერხდეს ბიზნესზე პანდემიის გავლენის შემცირება.

"საქართველოს ტურიზმის ინდუსტრიის ალიანსი ტურიზმის სექტორში მომუშავე ორგანიზაციების ინიციატივით პანდემიის პირობებში შეიქმნა, რომლის ურთიერთშეთანხმების მემორანდუმს 2020 წლის 5 მაისს მოეწერა ხელი. დღეისთვის 27 ბიზნეს გაერთიანებითაა წარმოდგენილი.

ინიციატივის მხარდამჭერია USAID ეკონომიკური მმართველობის პროგრამა და USAID ეკონომიკური უსაფრთხოების პროგრამა საქართველოში.

მოგეხსენებათ, საქართველოს ეკონომიკისთვის ტურისტული ინდუსტრია ერთ-ერთი წამყვანი დარგია. შესაბამისად კორონავირუსის გავრცელების უარყოფითი ზეგავლენა უპირველესად ტურიზმის სექტორს შეეხო. პანდემიამ ნათლად დაგვანახა, თუ რაოდენ მნიშვნელოვანია ტურიზმის სექტორში მომუშავე ასოციაციების და დარგის სპეციალისტების დიალოგი მთავრობას და მის ეკონომიკურ გუნდთან, დარგის მიერ ერთიანი, შეჯერებული ხედვის ადვოკატირება, პრიორიტეტული საკითხების არგუმენტირებულად ჩამოყალიბება და მთავრობისთვის მიწოდება.

გასული თვეები ეკონომიკურ ჭრილში ძალიან რთული გამოწვევა აღმოჩნდა სექტორისთვის, რომელსაც ინდუსტრიის ათასობით პირდაპირი თუ ირიბი მოთამაშეები ყავს. დღეს, როდესაც პანდემიის მეორე ტალღის პირობებში ვიმყოფებით ცალსახად აღვნიშნავთ, რომ თითოეული ჩვენგანისთვის ადამიანების ჯანმრთელობა და სიცოცხლე უპირობო პრიორიტეტია. ამავე დროს გამოვდივართ რა ეკონომიკური ზეგავლენის მძიმე პირობებიდან ერთხმად აღვნიშნავთ, რომ ეკონომიკური პრობლემა საერთოა და ერთად უნდა ვიბრძოლოთ საერთო გამოწვევის დასაძლევად.

კიდევ ერთხელ მოგმართავთ თხოვნით, წარიმართოს პრობლემებზე უფრო ღრმად ორიენტირებული და ეფექტური დიალოგი თქვენთან და მთავრობის ეკონომიკურ გუნდთან, ერთიანი ძალებით შევამციროთ პანდემიის გავლენა ბიზნესზე, რათა გადამწყვეტი ბრძოლა კრიზისული სიტუაციის დასაძლევად და დარგის გადასარჩენად შედეგებზე ორიენტირებული იყოს.

აქვე მოგახსენებთ, რომ მოვიკვლიეთ ინდუსტრიის ფარგლებში გაერთიანებული ორგანიზაციების ეკონომიკურ-სოციალური სტატუსი და შესაბამის ანალიტიკურ ინფორმაციაზე დაყრდნობით გთხოვთ, გადახედოთ მიღებულ გადაწყვეტილებას, დაპირებისამებრ განახორციელოთ წერტილოვანი შეზღუდვები, გააუქმოთ ინდუსტრიის ჩაკეტვა და მოკლევადიან პერიოდში გადაიჭრას ყველა ის გამოწვევა, რომელიც ტურიზმში დასაქმებულთა წინაშე დგას:

1.სარესტორნო სფეროს დახურვის გაუქმება; (უახლოეს პერიოდში მიიღებთ სარესტორნო ბიზნესის მიმართვის წერილს).

2. სამთო კურორტების დახურვის გაუქმება და გახსნა რეგულაციების მკაცრი დაცვით;

3. საბანკო სესხების გადავადება 2021 წლის ზაფხულამდე, როგორც იურიდიული პირებისთვის, ასევე სექტორში დასაქმებულთათვის, ვინც დაკარგა სამსახური;

4. ტურიზმის აღდგენის პროცესის დეტალურად დასაგეგმად გთხოვთ შეიქმნას სამუშაო ჯგუფი, რომელშიც ინდუსტრიის ყველა წარმომადგენელი ჩაერთვება შესაბამისი რეკომენდაციებით.

საქართველოს ტურიზმის ინდუსტრიის ალიანსი მხარს უჭერს მთავრობის ყველა, დროულ და აუცილებელ ზომას ჩვენი ქვეყნის მოქალაქეების ჯანმრთელობის დასაცავად და კერძო სექტორის მხარდასაჭერად. ამავე დროს, ალიანსის თითოეული წევრი გამოხატავს სრულ მზაობას, ჩაერთოს ყველა არსებული ადამიანური რესურსით საერთო გამოწვევის დაძლევაში და ერთად შევიმუშაოთ დამატებითი მექანიზმები სექტორის გადასარჩენად.

თქვენი მხრიდან მხარდაჭერა და კომუნიკაცია კიდევ უფრო გაზრდის და გააძლიერებს ალიანსის, როგორც ძლიერი ინსტიტუტის როლს, რომლის ძირითადი სამომავლო მიზანი ტურიზმის მდგრადი და სტაბილური განვითარებაა", აღნიშნულია საქართველოს ტურიზმის ინდუსტრიის ალიანსის მიერ პრემიერ-მინისტრისათვის გაკეთებულ მიმართვაში, რომელსაც ხელს აწერენ ალიანსის წევრები:

1.საქართველოს გასტრონომიის ასოციაცია

2. საქართველოს ეკოტურიზმის ასოციაცია

3. სასტუმროების და რესტორნების ფედერაცია

4. საქართველოს გიდების ასოციაცია

5.გასტრონომიული ტურიზმის ბიზნეს ასოციაცია

6.საქართველოს ტურიზმის ასოციაცია

7.ტურიზმის ინსტიტუტი

8.საქართველოს ტურიზმის ნეთვორქი

9.საქართველოს სერთიფიცირებული გიდების ასოციაცია

10. საქართველოს ტრადიციული რეწვის ასოციაცია

11.საქართველოს ახალგაზრდა გიდების ასოციაცია

12. სამაცხე-ჯავახეთის ტრადიციული მეღვინეობის ასოციაცია