მონტონეგრომ პერსონა ნონ გრატად გამოაცხადა პოდგორიცაში სერბეთის ელჩი ვლადიმირ ბოჟოვიჩი. განცხადება მონტენეგროს საგარეო საქმეთა სამინისტრომ გუშინ, 28 ნოემბერს გამოაქვეყნა.
საგარეო საქმეთა სამინისტრომ განაცხადა, რომ სერბი დიპლომატი დიდი ხნის განმავლობაში ერეოდა მონტენეგროს შიდა საქმეებში, მიუხედავად განმეორებითი გაფრთხილებისა, ასეთი ქცევის დაუშვებლობის შესახებ.
ბოჟოვიჩმა მონტენეგროს ასამბლეის (პარლამენტის) გადაწყვეტილებას 1918 წელს სერბეთთან შეერთების შესახებ მონტენეგროელი ხალხის "განთავისუფლება" და "თავისუფალი ნება" უწოდა.
მონტენეგროს საგარეო საქმეთა სამინისტრომ აღნიშნა, რომ 2018 წელს ქვეყნის პარლამენტმა მიიღო რეზოლუცია, რომლითაც გაუქმდა ასამბლეის 1918 წლის გადაწყვეტილება, ამიტომ სერბეთის ელჩის განცხადებები აკნინებს მონტენეგროს ამჟამინდელ პარლამენტს.
სერბი დიპლომატის პერსონა ნონ გრატად გამოცხადებიდან რამდენიმე საათში, სერბეთმა ბელგრადში მონტენეგროს ელჩი ტარზან მილოშევიჩი პერსონა ნონ გრატად გამოაცხადა.
სერბეთის საგარეო საქმეთა სამინისტრომ დიპლომატს ქვეყნის დატოვება 72 საათში უბრძანა.
2006 წელს დამოუკიდებლობის გამოცხადებამდე მონტენეგრო იყო სერბეთისა და მონტენეგროს ფედერაციული სახელმწიფოს ნაწილი. სერბეთიც და მონტენეგროც ევროკავშირის წევრობის კანდიდატები არიან.