რანის პრეზიდენტი ჰასან როჰანი ისრაელს ბირთვული ფიზიკოსის მოჰასენ ფაჰრიზადეს მკვლელობაში ადანაშაულებს და აცხადებს, რომ აღნიშნული დანაშაული ვერ შეაფერხებს ირანის ბირთვული დარგის განვითარებას. ინფორმაციას სააგენტო Reuters-ი ავრცელებს.
"წამებულ ფაჰრიზადეს მკვლელობა ცხადყოფს ჩვენი მტრების სასოწარკვეთას და მათ ღრმა სიძულვილს... მისი მოწამეობრივი სიკვდილი ვერ შეაჩერებს ჩვენს მიღწევებს", - განაცხადა როჰანიმ.
ცოტა ხნის წინ ირანის თავდაცვის უწყებამ დაადასტურა, რომ ფაჰრიზადე სამინისტროსთან არსებული კვლევებისა და ინოვაციების ორგანიზაციის ხელმძღვანელი იყო.
27 ნოემბერს ფაჰრიზადეს შეიარაღებული პირები თავს დაესხნენ. ფაჰრიზადე დაცვის წევრებსა და თავდამსხმელებს შორის მოხდარი შეტაკებისას მძიმედ დაიჭრა და კლინიკაში გარდაიცვალა. სააგენტო Fars-ის ცნობით, თავდასხმა თეირანის პროვინციის ქალაქ აბსარდში მოხდა.
ირანის საგარეო საქმეთა მინისტრმა მუჰამედ ჯავად ზარიფმა მიანიშნა, რომ მეცნიერის მკვლელობაში ისრაელის ხელი ურევია. მინისტრმა საერთაშორისო საზოგადოებას და ევროკავშირს მოუწოდა შეწყვიტოს "ორმაგი სტანდარტების" პოლიტიკა და "სახელმწიფო ტერორიზმის" აქტი დაგმოს.
ფოტო: Reuters