2020 წლის ოქტომბერში, 2019 წლის ანალოგიურ პერიოდთან შედარებით, საერთაშორისო ვიზიტორთა რაოდენობა 92.9%-ით შემცირდა, ხოლო ტურისტების რაოდენობა 90%-ით. საქართველოში 2020 წლის აპრილის შემდეგ, წინა წლის შესაბამის პერიოდთან შედარებით, ჩამოსულ უცხოელთა რაოდენობა მინიმუმ 90%-ით იკლებდა.
სასტუმროს ფასების ცვლილებები აჭარასა და გურიაში ტურიზმის შემცირებას ყველაზე კარგად ასახავს. 2020 წლის ოქტომბერში, სასტუმროების ფასების წლიური ინდექსი გურიაში 51%-ით, ხოლო აჭარაში 27.2%-ით შემცირდა.
"COVID-19 პანდემიამ ტურიზმის სექტორი მთელი მსოფლიოს მასშტაბით შეაჩერა. მეტად სავარაუდოა, რომ, ძირითადად, უსაფრთხოებაზე ზრუნვისა და ეკონომიკური პრობლემების გამო, მასობრივი ტურიზმი შემცირდება მომდევნო რამდენიმე წლის განმავლობაშიც, რაც სავარაუდოდ გავლენას მოახდენს საერთაშორისო ვიზიტების მიზნობრიობის სტრუქტურაზეც.
უფრო მეტიც, არსებული შოკის ხანგრძლივობის გამო, ასევე, სავარაუდოა, რომ მოგზაურობის მოდელები პანდემიის დასრულების შემდეგ შეიცვლება, რადგან მომხმარებელთა ქცევაზე მნიშვნელოვან გავლენას ახდენს პანდემიის შედეგად წარმოშობილი ფსიქოლოგიური და ეკონომიკური ფაქტორები1. ამ გამოშვებაში, ჩვენ გავაანალიზეთ საქართველოში საერთაშორისო ვიზიტების მიზნობრიობის სტრუქტურა 2015-2019 წლებში, რათა წარმოდგენა შეგვექმნას, თუ რა მდგომარეობა გვქონდა პანდემიამდე ამ კუთხით.
„დასვენება, გართობა, რეკრეაცია“, როგორც ვიზიტის მიზნობრიობის კატეგორია, ყველაზე გავრცელებული იყო 2015-2019 წლების პერიოდში.
ძირითადად აღნიშნული კატეგორიის ვიზიტების ზრდის ხარჯზე იზრდებოდა ჯამური ვიზიტორების რაოდენობაც. ყოველწლიურად მოცემული კატეგორიის ვიზიტების რაოდენობა საშუალოდ 20%-ით იზრდებოდა, მათი აბსოლუტური რაოდენობა 2015-დან 2019 წლამდე გაორმაგდა და მათი წილი მთლიან ვიზიტებში გაიზარდა 31%-დან (2015 წელს) 43%-მდე (2019 წელს). თუმცა, იმის გათვალისწინებით, რომ დასვენების, გართობისა და რეკრეაციის მიზნით მოგზაურობა არ მიიჩნევა „სასიცოცხლოდ მნიშვნელოვნად“, ამ მიზნობიობის ვიზიტების რაოდენობა მოსალოდნელია რომ დაიკლებს. იტალიაში ჩატარებულმა გამოკითხვამ აჩვენა, რომ გამოკითხულთა 43% აპირებს მოგზაურობის შემცირებას, პანდემიასთან დაკავშირებული ყველა შეზღუდვის მოხსნის შემდეგაც კი.
კატეგორიის „დასვენება, გართობა, რეკრეაცია“ გარდა, საქართველოში საერთაშორისო ვიზიტების ორი სხვა დიდი კატეგორიაა - "მეგობრების, ნათესავების მონახულება" და "ტრანზიტი". ვიზიტების რაოდენობა ამ კატეგორიებში დროთა განმავლობაში სტაბილური იყო - მათი რაოდენობა 2019 წელს, 2015 წელთან შედარებით, მხოლოდ 19%-ით და 25%-ით გაიზარდა, შესაბამისად. მცირე ზრდის ტემპმა მთლიან ვიზიტებში ამ კატეგორიების წილის შემცირება გამოიწვია. ”საქმიანი და პროფესიული“ კატეგორიის ვიზიტებს შედარებით მოკრძალებული წილი აქვს მთლიან ვიზიტებში (11% 2019 წელს), თუმცა ამ კატეგორიის ვიზიტების აბსოლუტური რაოდენობა მნიშვნელოვნად - 2015 წლიდან 2019 წლამდე 46%-ით გაიზარდა. „შოპინგი“,
„მკურნალობა, გაჯანსაღება“ და ”სხვა” კატეგორიის ვიზიტებს გააანალიზებულ პერიოდში არ ჰქონია ვიზიტების მთლიან რაოდენობაში მნიშვნელოვანი წილი.
საერთაშორისო ვიზიტების უდიდესი და ყველაზე მზარდი კატეგორია, „დასვენება, გართობა, რეკრეაცია“ მნიშვნელოვნად შემცირდება მიმდინარე პანდემიის გამო", აღნიშნულია PMCG-ის მიერ მომზადებულ კვლევაში. აღსანიშნავია, რომ საქართველოში სასტუმროების ფასების ინდექსი 2020 წლის ოქტომბერში, 2020 წლის სექტემბერთან შედარებით, 7.6%-ით შემცირდა, მათ შორის 3, 4 და 5 ვარსკვლავიანი სასტუმროების ფასების ინდექსი შემცირდა 9.4%-ით, ხოლო საოჯახო ტიპის სასტუმროების ფასები შემცირდა 0.5%-ით.
2020 წლის ოქტომბერში, 2019 წლის ოქტომბერთან შედარებით, სასტუმროების ფასების ინდექსი 7.4%-ით შემცირდა, მათ შორის 3, 4 და 5 ვარსკვლავიანი სასტუმროების ფასების ინდექსი 11.2%-ით შემცირდა, ხოლო საოჯახო ტიპის სასტუმროების ფასები 2.1%-ით შემცირდა
2020 წლის ოქტომბერში, საქართველოში 3-ვარსკვლავიანი სასტუმროების საშუალო ფასმა1 120 ლარი შეადგინა, ხოლო 4-ვარსკვლავიანი სასტუმროების საშუალო ფასმა - 211 ლარი. საოჯახო ტიპის სასტუმროების2 საშუალო ფასმა ოქტომბერში 67 ლარი შეადგინა.
5-ვარსკვლავიან სასტუმროთა საშუალო ფასმა ოქტომბერში 387 ლარი შეადგინა. თბილისში, ამ ტიპის სასტუმროებში, სტანდარტული 2-ადგილიანი ნომრის საშუალო ფასმა 454 ლარი შეადგინა, გურიაში - 432 ლარი, სამცხე-ჯავახეთში - 424 ლარი, ხოლო კახეთში 395 ლარი.